هەڵەیەک روویدا! دووبارە هەوڵبدە
چەند کارمەندێکی کۆمیسیۆن. وێنە: رووداو
رووداو دیجیتاڵ
بەگوێرەی نووسراوێک کە واژۆی هێمن هەورامی، جێگری سەرۆکی پەرلەمانی کوردستان لەسەرە "کۆمیسیۆن کارابووەتەوە" و سەرۆکی کۆمیسیۆنیش لە پەراوێزی نووسراوەکەدا پیرۆزبایی بۆ کۆمیسیاران نووسیوە.
هەندرێن محەممەد، سەرۆکی ئەنجوومەنی کۆمیسیاران بە رووداوی گوت: دەست دەکەین بە کارەکانمان، لەبارەی بودجە، لیست، قەوارەی سیاسی و بەربژێرەکان و ئەگەر پێویست بکات رۆژانی پشووش دەوام دەکەین بۆ ئەوەی لە کاتی خۆیدا ئامادەکارییەکان بۆ هەڵبژاردن تەواو بن.
بڕیارە دوو کۆمیسیارە تازەکە لەم دوو رۆژە سوێندی یاسایی بخۆن، بەشەکانی کارگێڕی کۆمیسیۆن راسپێردراون دەست بەکارەکانیان بکەنەوە و لە سەرەتای هەفتەی داهاتوو یەکەمین کۆبوونەوەی کۆمیسیۆن دەکرێت و دەست بە ئامادەکارییەکانی هەڵبژاردن دەکەن.
یەکێتی نووسراوەکەی کاراکردنەوەی کۆمیسیۆن بە نایاسایی دەزانێت و گۆڕان و یەکگرتووش بە رووداویان گوت، بۆ ئەوەی گرژیی زیاتر دروست نەبێت قسەی لەبارەوە ناکەن. هەروەها کۆمەڵی دادگەری هاوڕایە لەگەڵ یەکێتی.
شوان رابەر، ئەندامی ئەنجوومەنی سیاسیی کۆمەڵی دادگەری دەڵێت: رێککەوتنێک پێشتر کرابوو لە نێوان حیزبەکان، بەڵام کاتێک بە تەنها حیزبێک بڕیاری لێبدات بە تەنها واتە شەرعییەت وەرناگرێت تاوەکو ئەگەر نووسراویش بۆ کۆمیسیۆن کرابێت ئەندام و لایەنەکان پێیەوە پابەند نابن و کۆمەڵی دادگەریش پێیەوە پابەند نابێت و کۆمیسیارەکەی ناچێتە کۆبوونەوە.
پارتی و یەکێتی لەسەر کاراکردنەوەی کۆمیسیۆن هاوڕابوون، بەڵام یەکەم هەنگاوی کرداری بۆ کاراکردنەوەی بووە خاڵی ناکۆک و هەموو شتێکی هەڵگێڕایەوە. رێواز فایەق، سەرۆکی پەرلەمانی کوردستان نووسراوێکی ئاراستەی دامەزراوەکانی هەرێمی کوردستان کردووە و داوا دەکات کار بەو نووسراوانەی پەرلەمان لەبارەی دانیشتنەکەی 22ـی ئایار نەکەن، ئەگەر واژۆی ئەوی لەسەر نەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ