هەڵەیەک روویدا! دووبارە هەوڵبدە
کوردستان
شارەزایەکی کەشناسی دەڵێت، شەوی سەری ساڵ نێو سەنتەری شارەکان باراناوی دەبێت و چیاکانیش سپیپۆش دەبن.
رووداو دیجیتاڵ
بەڕێوەبەرایەتیی کەشناسیی هەرێمی کوردستان رایدەگەیێنێت، درەنگی ئەمشەو نمەباران دەستپێدەکات و لە ناوچە شاخاوییە بەرزەکانیش بەفر دەبارێت. شارەزایەکی کەشناسییش دەڵێت، شەوی سەری ساڵ نێو سەنتەری شارەکان باراناوی دەبێت و چیاکانیش سپیپۆش دەبن.
ئەمڕۆ سێشەممە 23-12-2025، بەڕێوەبەرایەتیی کەشناسی و بوومەلەرزەزانیی هەرێمی کوردستان رایگەیاند، پلەکانی گەرما 2 بۆ 3 پلەی سیلیزی دادەبەزن؛ درەنگی شەو لە رۆژهەڵات و نێوەڕاستی هەرێمی کوردستان نمەباران و لە ناوچە شاخاوییە بەرزەکانیش بەفر دەبارێت.
بەگوێرەی کەشناسی، سبەی چوارشەممە ئاسمان هەوری تەواو دەبێت و نمەباران بەردەوام دەبێت، بەڵام لە کاتەکانی نیوەڕۆدا لە ناوچەکانی نێوەڕاست و رۆژهەڵاتی هەرێمی کوردستان کەش ئاسایی دەبێتەوە.
شەوی سەری ساڵ چۆن دەبێت؟
محەممەد کەمال، شارەزای کەشناسی بە تۆڕی میدیایی رووداوی گوت: "لەم شەوەوە، کەشێکی ناسەقامگیر لە بەشێکی ناوچەکانی هەرێمی کوردستان دروست دەبێت و لە پارێزگاکانی هەولێر، سلێمانی، کەرکووک و گەرمیان باران دەبارێت؛ بڕی بارانەکە لاواز و مامناوەند دەبێت و پشکی زۆرترین باران بەر کەرکووک دەکەوێت."
ئەو شارەزایە ئاماژەی بەوەش کرد، لە 27ـی مانگەوە شەپۆلێکی دیکەی بارانبارین دەگاتە هەرێمی کوردستان و تاوەکو 2-1-2026 بەردەوام دەبێت؛ لەو نێوەندەدا ئەگەری بارانبارینی باش هەیە، بەڵام مەترسیی لافاوی لێ ناکرێت.
بە گوتەی محەممەد کەمال: "لە 28ی مانگەوە تاوەکو 2ی 1ی 2026 هەموو شاخەکانی هەرێمی کوردستان سپیپۆش دەبن و پێشبینی دەکرێت بەفربارین تاوەکو شەقڵاوە بێت و بەرزاییەکانی سلێمانیش بگرێتەوە."
هاوکات د. لوقمان موفتی، شارەزای کەشناسی بە رووداوی راگەیاند، بۆ ئەم دوو سێ رۆژە پێشبینیی بارانێکی لاواز و نمەباران لە هەولێر، کەرکووک و گەرمیان دەکرێت.
سەبارەت بە کەشوهەوای کۆتایی ساڵیش، د. لوقمان دەڵێت: "لە کۆتایی مانگدا شەپۆلێکی بارانبارینی 'نزمەپەستانی کلاسیکی' روو لە ناوچەکە دەکات؛ لە ناوچە شاخاوییەکان بڕی باران زیاتر دەبێت و بەگشتی تاوەکو ساڵی نوێ کەشەکە تەڕ دەبێت."
بەرزترین پلەکانی گەرمای پێشبینیکراو بۆ سبەی:
هەولێر: 16 پلە
سلێمانی: 13 پلە
دهۆک: 15 پلە
زاخۆ: 16 پلە
کەرکووک: 16 پلە
هەڵەبجە: 11 پلە
گەرمیان: 17 پلە
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ