سووتانی دارێکی بەتەمەن بەهۆی ئاگرەکەوە
رووداو دیجیتاڵ
ئاگرەکەی ناوچەی کۆکۆیی سنووری پارێزگای هەڵەبجە، زیانێکی زۆری بە ژینگە و کشتوکاڵی ناوچەکە گەیاندووە و بەرهەمی بنێشتی دەیان هاونیشتمانی و کرێکاری کردووەتە خۆڵەمێش، کە چاوەڕێی داهاتی ئەمساڵیان دەکرد.
حەکیم حەبیب، خەڵکی رۆژهەڵاتی کوردستانە و یەکێکە لەو کرێکارانەی زیانی گەورەی بەرکەوتووە. ئەو بە هیوا بوو دوای 50 رۆژ ماندووبوون و دووری لە خێزانەکەی، بەرهەمی بنێشتی ئەمساڵ کۆبکاتەوە، بەڵام ئاگرێکی 3 رۆژە خەونەکانی ئەوی کردە خۆڵەمێش.
ئەو لەگەڵ دوو کرێکاری دیکەدا لە گوندی مۆردین خەریکی بنێشتکردن بوون لە داری قەزوانەکان، کە سەرچاوەی بژێویی چەندین خێزانی ناوچەکەیە، بەڵام ئاگرەکە هیوا و ئاواتی ئەوانیشی لەگەڵ خۆیدا سووتاند.
حەکیم حەبیب بە تۆڕی میدیایی رووداوی راگەیاند: "بۆ ژیان و بۆ پارە هاتبووین، 50 رۆژە لێرە کاردەکەین. ئێستا 80%ـی بنێشتەکەمان سووتاوە و دەبێت فڕێی بدەین. بمانفرۆشتبایە بەهای 400 بۆ 500 ملیۆن دینار دەکرد، بەڵام ئێستا 50 ملیۆنیشی نەماوە".
ئاگرەکەی هەڵەبجە جگە لەوەی ژیانی لە دوو کەس سەندەوە، هەزاران دۆنم زەویی باخ و دارستانی سرووشتیشی سووتاند pic.twitter.com/jgJdOXwDvz
— Rudaw (@Rudawkurdish) August 23, 2025
ئاگرەکە بووەتە هۆی سووتانی دارستان و لەوەڕگای زیاتر لە 6 گوندی ناوچەکە. بە گوتەی گوندنشینان، شوێنەواری ئەم کارەساتە بۆ ماوەیەکی درێژخایەن دەمێنێتەوە.
فازڵ حەمەساڵح، دانیشتووی گوندی مۆردینە و یەکێکە لە زیانلێکەوتووەکان. ئەو بە رووداوی گوت: "نزیکەی 4 بۆ 5 باخ سووتاون، لەگەڵ داربەڕوو و دار قەزوانەکان. ئەو دار قەزوانانەی سووتاون، بەرهەمی ئەوتۆیان نابێتەوە و کاریگەریی ئەم سووتانە بۆ 10 بۆ 15 ساڵی داهاتووش دەمێنێتەوە و 20 ساڵی دەوێت تاوەکو دارەکان بگەڕێنەوە بۆ بەرهەمی بنێشت".
لەبەرامبەردا، پارێزگاری هەڵەبجە بڕیاریداوە لیژنەیەک بۆ خەمڵاندنی زیانەکانی ئاگرەکەی ناوچەی کۆکۆیی پێکبهێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ