هەڵەیەک روویدا! دووبارە هەوڵبدە
رووداو دیجیتاڵ
سەرکۆنسووڵی کۆماری ئیسلامیی ئێران لە هەولێر هێرشە درۆنییەکەی سەر کێڵگەی گازی کۆرمۆر سەرکۆنە دەکات و رایدەگەیێنێت، ئەنجامدەرانی ئەو کارە هەر لایەنێک بن "قبووڵکراو نییە" و کارەکە بە هێرش بۆ سەر خۆشگوزەرانیی خەڵک دەزانن.
رۆژی هەینی، 28-11-2025، فەرامەرز ئەسەدی، سەرکۆنسووڵی کۆماری ئیسلامیی ئێران لە هەولێر، لەبارەی هێرشکردنە سەر کێڵگەی گازی کۆرمۆر هەڵوێستی وڵاتەکەی خستەڕوو و بە رووداوی راگەیاند: "کردەوەکە لەلایەن هەر کەسێکەوە کرابێت، قبووڵکراو نییە و سەرکۆنەی دەکەین."
سەرکۆنسووڵی ئێران لە هەولێر ئاماژەی بەوەدا، تێڕوانینی ئەوان بۆ ئەو رووداوە ئەوەیە کە دەستدرێژییە بۆ سەر سەقامگیریی ناوچەکە و گوتی: "پێمانوایە ئەم کردەوەیە هێرشکردنە سەر ئاسایشی هەرێمی کوردستانی عێراق و خۆشگوزەرانیی خەڵکی خۆشەویستیەتی."
شەوی چوارشەممە 26ى تشرینی دووەمی 2025 هێرش کرایە سەر کێڵگەی کۆرمۆر لە چەمچەماڵ و بەهۆیەوە ئاگر لە کۆگایەکی گەورەی کێڵگەکە کەوتەوە، لە ئەنجامدا 80% کارەبای هەرێمی کوردستان کەم بووەوە.
هێرشەکەی سەر کۆرمۆر، کە تاوەکو ئێستا بکەرەکانی ئاشکرا نەکراون، کاردانەوەی نێوخۆیی و نێودەوڵەتی لێکەوتەوە. حکومەتی عێراق بڕیاری دا لیژنەیەکی لێکۆڵینەوە لە بارەی هێرشەکە پێکبهێنێت.
هەینی 28ى تشرینی دووەمی 2025 سەباح نوعمان، گوتەبێژی فەرماندەی گشتیی هێزە چەکدارەکانی عێراق بە تۆڕی میدیایی رووداوی راگەیاند: لیژنەیەک بە سەرۆکایەتیی عەبدولئەمیر شەممەری و بە ئەندامێتیی سەرۆکی دەزگای هەواڵگری و وەزیری ناوخۆی هەرێمى کوردستان و بە پاڵپشتى هاوپەیمانیی نێودەوڵەتی، لێکۆڵینەوە لە رووداوی هێرشکردنە سەر کێڵگەی کۆرمۆر دەکەن.
سەر لە بەیانی رۆژی هەینی لیژنەکە گەیشتە کێڵگەی کۆرمۆر و دەستی بە کارەکانی کرد، سەباح نوعمان رایگەیاند، ئەنجامی لێکۆڵینەوە لە بارەی هێرشەکە لە ماوەی 72 کاژێردا دەردەکەوێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ