کوردستان
ساتی گەیشتنی یەکەم بارهەڵگری کەمپەینی رەنجی رووداو بە رۆژئاوای کوردستان، دواتر هاوکارییەکان لەلایەن دەزگای خێرخوازیی بارزانییەوە دابەش دەکرێن
رووداو دیجیتاڵ
دەزگای خێرخوازی بارزانی رایگەیاند، بەردەوامن لە دابەشکردنی هاوکاری لە رۆژئاوای کوردستان. جگە لە خۆراک، ژەمەخۆراک، جلوبەرگ و پێداویستییەکانی دیکە، نزیکەی 200 هەزار لیتر نەوتیان دابەشکردووە.
رەواج حاجی، ئەندامی دەستەی کارگێڕی دەزگای خێرخوازیی بارزانی، ئەمڕۆ پێنجشەممە بە تۆڕی میدیایی رووداوی گوت: "تاوەکو ئەمڕۆ 206 بارهەڵگر هاوکاری جیاوازمان گەیاندووەتە هاونیشتمانیانی رۆژئاوای کوردستان".
بەگوێرەی ئاماری رێکخراوەکە، تاوەکو ئەمڕۆ هاوکارییان گەیاندووە 6 هەزار و 609 خێزان لە 150 قوتابخانەدا کە ئاوارەکانی تێدا نیشتەجێن.
رەواج حاجی گوتی: "دابەشکردنی سووتەمەنی بەردەوامە و تاوەکو ئەمڕۆ 198 هەزار و 657 لیتر نەوت بەسەر 5 هەزار و 969 خێزاندا دابەشکراوە، کە لە 169 قوتابخانە و 9 مزگەوتدا نیشتەجێ کراون".
دەزگای خێرخوازی بارزانی، تاوەکو ئەمڕۆ 19 هەزار و 979 ژەمەخۆراکی گەرمیان پێشکێشی ئاوارەکانی رۆژئاوای کوردستان کردووە لە 52 قوتابخانە و 3 مزگەوتدا.
دەزگای خێرخوازی بارزانی لەگەڵ دابەشکردنی هاوکارییەکاندا، لە یەک هەفتەی رابردوودا خزمەتگوزاری پێشکێشی 3 هەزار و 160 هاونیشتمانی کردووە.
بەهۆی هێرشەکانی سووپای عەرەبیی سووریاوە بۆ گەڕەکە کوردنشینەکانی حەلەب لە 06ـی ئەم مانگە و دواتر فراوانبوونی هێرشەکان بۆ تەواوی ناوچەکانی ژێر دەسەڵاتی بەڕێوەبەرایەتی خۆسەر، هەزاران هاونیشتمانی ئاوارەی ناوچە ئارامەکانی رۆژئاوای کوردستان بوون.
21ـی ئەم مانگە دەزگای خێرخوازی بارزانی 67 بارهەڵگر هاوکاری گەیاندە رۆژئاوای کوردستان و رۆژی دواتر دابەشکردنی دەستپێکرد و تاوەکو ئەمڕۆ بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ