رووداو دیجیتاڵ
تەرمی ئەو پیاوە بەساڵاچووە دۆزرایەوە کە دوێنێ ئێوارە لە رووبارێکی نزیک قەزای دوبزی پارێزگای کەرکووک هەوڵی رزگارکردنی کوڕێکی و دوو نەوەی دا. قایمقامی دوبز دەڵێت، "پیاوە بەتەمەنەکە گیانی لەدەستدا، بەڵام کوڕەکەی و دوو نەوەکەی رزگارکران."
سەرهەد فاتیح، ئەندامی تیمی مەلەوانیی دوبز، ئەمڕۆ شەممە بە تۆڕی میدیایی رووداوی راگەیاند، "سەرلەبەیانیی ئەمڕۆ و دوای گەڕانێکی زۆری تیمەکانی فریاکەوتن و مەلەوانی، تەرمی ئەو پیاوە لەنێو رووبارەکەدا دۆزرایەوە."
تەرمەکە بۆ رێکارە یاساییەکان رادەستی پۆلیس کراوە.
عادل محەممەد، قایمقامی قەزای دوبز، بە رووداوی گوت، "خێزانێکی عەرەب لە گەڕەکی دۆمیزی کەرکووک بۆ سەیران و گەشت هاتنە ناوچەکە؛ باوکێک و کوڕ و کچێکی کەوتنە نێو ئاوی رووبارەکەوە."
قایمقامی دوبز گوتی، "باپیرەی منداڵەکان کە تەمەنی 65 ساڵ بوو، بە پەلە خۆی فڕێ دایە نێو ئاوەکە بۆ ئەوەی رزگاریان بکات. باوک و دوو منداڵەکە لەلایەن خەڵکی ناوچەکەوە رزگارکران، بەڵام پیاوە بەتەمەنەکە خۆی خنکا."
رووداوەکە لە شوێنێک روویداوە کە نزیکەی دوو کیلۆمەتر لە بەنداوی نمرە هەشتەوە دوورە و دەکەوێتە نزیک گۆڕستانی دوبز کە بە گوتەی قایمقام، "شوێنێکی قووڵ و مەترسیدارە بۆ مەلەکردن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ