هەڵەیەک روویدا! دووبارە هەوڵبدە
رووداو دیجیتاڵ
بەرزترین رێژەی گازی دووەم ئۆکسیدی کبریت و یەکەم ئۆکسیدی کاربۆن لەسەر ئاستی عێراق لە پارێزگای کەرکووک تۆمارکراون. بەگوتەی سەرۆکی رێکخراوێکی تایبەت بە ژینگە، هۆکارەکەی سووتانی گازی هاوەڵ و نزیکیی کێڵگە و پرۆژەکانی نەوتە لە شوێنی نیشتەجێبوون.
ئەو ئامارە بەگوێرەی پێوەرە ژینگەییەکان بووە کە دەستەی ئاماری گشتیی عێراق لەسەر ئاستى پارێزگاکان (جگە لە هەرێمى کوردستان) ئامادەی کردووە.
بەگوێرەی پێوەرەکان، بەرزترین رێژەی گازی دووەم ئۆکسیدی کبریت لە کەرکووک تۆمار کراوە کە 0.235 بەش بووە لە یەک ملیۆن، هەروەها بەرزترین رێژەی یەکەم ئۆکسیدی کاربۆن لەسەر ئاستی عێراق هەر لە کەرکووک بووە کە 3.977 بووە لە یەک ملیۆن.
عومەر عەبدولـلەتیف، سەرۆکی روانگەی عێراقی سەوز بە تۆڕی میدیایی رووداوی رایگەیاند: "تۆمارکردنی ئەو رێژەیە لە گازە ژەهراوییەکان پەیوەندیدارە بە پڕۆژەکانی نەوت لە کەرکووک و زۆریی رێژەی سووتانی گازی هاوەڵ لە کێڵگەکان، کە هەمان کێشە لە بەسرە و مەیسان-یش هەیە و گازی ژەهراوی دەردەدەن."
چوار کێڵگەی سەرەکیی نەوت لە کەرکووک هەن، کە لەگەڵ دەرهێنانی نەوت تێیاندا، گازی هاوەڵ دەردەچێت و دەسووتێت، ئەوەش کاریگەریی لەسەر پیسبوونی ژینگە هەیە.
سەرۆکی روانگەی عێراقی سەوز، کە رێکخراوەکەی تایبەتە بە پرسی ژینگە رایگەیاند، یەکێک لە هۆکارەکانی دیکەی کاریگەریی گازی ژەهراوی لە کەرکووک، نزیکیی کێڵگەکانە لە شوێنی نیشتەجێبوون، کە دەبێت لانیکەم 100 کێلۆمەتر لێیەوە دوور بێت.
بەگوێرەی ئەو راپۆرتە، بڕی ئەو گازەی لە ساڵی 2024 لە کێڵگەکانی نەوت و پاڵاوگەکان لەسەر ئاستی عێراق سووتاوە، 12 ملیار و 410 ملیۆن و 449 هەزار و 109 مەتر سێجا بووە لە هەر پێنج کۆمپانیاى نەوتى باکوور، بەسرە، ناوەند، زیقار و مەیسان.
زۆرترین بڕی گازی سووتاو کە یەکێکە لە هۆکارەکانی پیسبوونی هەوا لە عێراق، لە کۆمپانیای نەوتی بەسرە بووە کە زیاتر لە 7.9 ملیار مەتری سێجا بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ