رووداو دیجیتاڵ
یەکەم شەپۆلی بەفربارین و بارانی بەخوڕی ئەم وەرزە، کۆتایی بە وشکەساڵییەکی درێژخایەن هێنا، بەڵام کارەساتی لێکەوتەوە و لە چەند ناوچەیەکی ئەفغانستان بووە هۆی دروستبوونی لافاو و گیانلەدەستدانی دەیان کەس.
رۆژی پێنجشەممە 1-1-2026 محەممەد یوسف حەماد، گوتەبێژی دەسەڵاتی نیشتمانیی بەڕێوەبردنی کارەساتەکان لە ئەفغانستان رایگەیاند، بەهۆی لافاو و کەشوهەوای سەختەوە لە ناوچەکانی نێوەڕاست، باکوور، باشوور و رۆژئاوای وڵاتەکە، لانیکەم 17 کەس گیانیان لەدەستداوە و 11ـی دیکەش بریندار بوون.
حەماد گوتی: "لە ماوەی سێ رۆژی رابردوودا باران و بەفر لە زۆربەی پارێزگەکانی وڵات باریوە. لافاو رووی لە پارێزگەکانی (کاپیسا، پەروان، دایکوندی، ئوروزگان، قەندەهار، هێلمەند، بادغیس، فاریاب، بەدەخشان، هەرارت و فەرا) کردووە."
بەرپرسەکەی ئەفغانستان ئاماژەی بەوە کرد، لافاوەکە زیانی بە ژێرخانی ئەو ناوچانە گەیاندووە و مەڕ و ماڵاتی خەڵکەکەی لەناوبردووە؛ بەگشتی کاریگەریی نەرێنی لەسەر ژیانی هەزار و 800 خێزان دروستکردووە کە زۆربەیان لە هەژاریدا دەژین.
تیمەکانی فریاگوزاری و هەڵسەنگاندن رەوانەی ناوچە زیانلێکەوتووەکان کراون.
ئەفغانستان بەهۆی دەیان ساڵ جەنگ، تێکچوونی ژێرخان، بڕینەوەی دارستانەکان و کاریگەرییەکانی گۆڕانی کەشوهەواوە، بە یەکێک لە وڵاتە هەرە مەترسیدارەکان بۆ کارەساتە سرووشتییەکان دادەنرێت، بەتایبەت لە ناوچە دوورەدەستەکان کە خانووکان لە قوڕ دروستکراون و بەرگەی لافاو ناگرن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ