دوای سعودیە، ئەردۆغان سەردانی میسری کرد

رەجەب تەیب ئەردۆغان، سەرۆککۆماری تورکیا، بۆ چەند دیدارێکی فەرمی گەیشتە قاهیرەی پایتەختی میسر و لەلایەن عەبدولفەتاح سیسی، هاوتا میسرییەکەی پێشوازیی لێکرا.

 

رەجەب تەیب ئەردۆغان و شاندە باڵاکەی حکومەتی تورکیا، لە کۆشکی ئیتیحادیە لەلایەن عەبدولفەتاح سیسییەوە پێشوازیی لێکرا. دوای ئەوەی هەردوو سەرۆک لە شوێنی رێوڕەسمەکە وەستان، سروودی نیشتمانیی تورکیا و میسر لێدران.

 

دواتر هەردوو سەرۆککۆمار بە ئامادەبوونی شاندی هەردوولا کۆبوونەوە. بڕیارە دوای کۆبوونەوەکە چەند رێککەوتنێک واژۆ بکرێن و هەردوو سەرۆک کۆنگرەیەکی رۆژنامەڤانیی هاوبەش ساز بکەن.

 

 

لەو سەردانەیدا هەریەک لە ئەمینە ئەردۆغانی هاوسەری؛ هاکان فیدان، وەزیری دەرەوەی تورکیا؛ محەممەد شیمشەک، وەزیری گەنجینە و دارایی؛ ماهینوور ئۆزدەمیر گۆکتاش، وەزیری خێزان و کاروباری کۆمەڵایەتی؛ ئاڵپارسڵان بایراکتار، وەزیری وزە و سەرچاوە سرووشتییەکان؛ محەممەد فاتیح کاجر، وەزیری پیشەسازی و تەکنەلۆژیا؛ عوسمان ئاشکن باک، وەزیری وەرزش و لاوان؛ یاشار گولەر، وەزیری بەرگریی؛ کەمال مەیمیشئۆغڵو، وەزیری تەندروستی؛ بورهانەددین دوران، سەرۆکی فەرمانگەی پەیوەندییەکانی سەرۆکایەتی کۆمار و ئاکیف چاغاتای کڵچ، گەورەڕاوێژکاری سەرکۆمار بۆ سیاسەتی دەرەوە و ئاسایش و چەند بەرپرسێکی دیکە یاوەری ئەردۆغان دەکەن.