نەتەنیاهوو: سەرکردایەتیی ئێران بنبڕ دەکەین

 

 

جەنگەکە، کە پێی ناوەتە هەفتەی دووەمەوە، هیچ نیشانەیەکی هێوربوونەوەی پێوە دیار نییە. رۆژی شەممە، فڕۆکە جەنگییەکانی ئەمریکا و ئیسرائیل بۆ یەکەمجار هێرشیان کردە سەر ژێرخانی نەوتیی ئێران و دوو کۆگەی گەورەی سووتەمەنییان لە تاران بۆردومان کرد. 

 

هەروەها فڕۆکەخانەی نێودەوڵەتیی مێهراباد بەهۆی بۆردوومانەکانەوە ئاگری گرت و ئیسرائیل رایگەیاند، 16 فڕۆکەی جەنگیی ئێرانییان لە ناو فڕۆکەخانەکەدا تێکشکاندووە.

 

نەتەنیاهوو رایگەیاند، ئێستا ئیسرائیل "کۆنتڕۆڵی نزیکەی تەواوەتی" ئاسمانی تارانی لە دەستدایە.

 

سوپای پاسدارانی ئێران دەڵێت، وەک تۆڵەیەک بۆ بۆردوومانکردنی وێستگەیەکی ئاو لە وڵاتەکەیان، هێرشیان کردووەتە سەر بنکەیەکی دەریایی ئەمریکا لە بەحرێن. هاوکات، زەنگی ئاگادارکردنەوە لە ئۆرشەلیم/قودس، دەوحە و مەنامە لێدرا. 

 

سعودیە رایگەیاند، درۆنێکی لە رۆژهەڵاتی ریاز تێکشکاندووە و ئیماراتیش ئاشکرای کرد کە بەرپەرچی 15 مووشەک و 119 درۆنی داوەتەوە. دەنگی تەقینەوە لە بەغدا، هەولێر و دوبەیش بیسترا.

 

وەزارەتی تەندروستیی ئێران رایگەیاند، تاوەکو ئێستا لانیکەم 926 مەدەنی کوژراون و نزیكەی 6,000 کەسیش بریندار بوون. عەلی لاریجانی، بەرپرسی ئەمنیی ئێران، واشنتن و ئیسرائیلی تۆمەتبار کرد بەوەی دەیانەوێت "ئێران پارچە پارچە بکەن."

 

ئیسرائیل هێرشەکانی بۆ سەر حیزبوڵڵا چڕتر کردووەتەوە و فەرمانی چۆڵکردنی بە دانیشتووانی ناوچەی باشووری بەیرووت داوە. حیزبوڵڵا رایگەیاند، 100 مووشەک و درۆنی ئاراستەی ئیسرائیل کردووە. لە لایەکی دیکەوە، هێزە تایبەتەکانی ئیسرائیل (کۆماندۆ) هێرشێکیان بۆ سەر رۆژهەڵاتی لوبنان کرد کە تێیدا 41 کەس کوژران، بەڵام نەیانتوانی ئامانجەکەیان (دۆزینەوەی تەرمی فڕۆکەوانێک) بەدەست بهێنن. وەزارەتی تەندروستیی لوبنان دەڵێت ژمارەی کوژراوانی ئەو وڵاتە گەیشتووەتە 294 کەس و 300,000 کەسیش ئاوارە بوون.

 

جەنگەکە بازاڕەکانی جیهانی هەژاندووە؛ نرخی نەوت بەردەوامە لە بەرزبوونەوە، چونکە ئێران هەوڵدەدات گەرووی هورمز دابخات. سوپای پاسداران رایگەیاند، لە رێگەی درۆنی تەقینەوەوە دوو کەشتیی نەوتهەڵگریان لە ناو کەنداودا پێکاوە.

 

لەکاتێکدا ترەمپ داوای "خۆبەدەستەوەدانی بێ مەرج" لە ئێران دەکات، تاران لە رێگەی باڵیۆزەکەی لە نەتەوە یەکگرتووەکان رایگەیاند، تەنیا گەلی ئێران بڕیار لەسەر داهاتووی وڵاتەکەیان و سەرکردایەتیی نوێ دەدەن.