ئەردۆغان لەبارەی غەززە: هەوڵەکانمان چڕکردوونەتەوە بۆ هێورکردنەوەی دۆخەکە

 

 

رۆژی یەکشەممە، 8ـی تشرینی یەکەمی 2023، رەجەب تەیب ئەردۆغان، سەرۆککۆماری تورکیا، لە ناوچەی یەشیلکۆی لە ئیستەنبووڵ، بەشداری لە رێوڕەسمی کردنەوەی کەنیسەی "مۆر ئەفرەم"ی کریستیانەکانی ئەرسۆدۆکسی سریانی کرد و گوتارێکی پێشکێشکرد. ئەردۆغان، بەشێکی گوتارەکەی تایبەت کرد بە رووداوەکانی بەیانی رۆژی 7ـی تشرینی یەکەمی 2023، کە هێزێکی کەتیبەکانی عیزەدین قەسام، باڵی سەربازیی بزووتنەوەی حەماس لە غەززەوە هێرشیانکردە سەر بنکە سەربازییەکانی ئیسرائیل. 

 

ئەردۆغان گوتی: "تورکیا هەموو هەوڵێکی دەدات بۆ کەمکردنەوەی گرژییەکان و راگرتنی شەڕوپێکدادانەکان. بۆ ئەمەش هەوڵە دیپلۆماسییەکانمان چڕتر کردوونەتەوە بۆ ئەوەی ئاگربەست رابگەیێندرێت و دۆخەکە ئارام ببێتەوە و لە هەوڵەکانیشماندا رژدین. داوا لە هەموو وڵاتە کاریگەرەکانی ناوچەکە دەکەین، ئەوانیش بۆ هەوڵی ئاشتی و ئاشتکردنەوە کاربکەن."

 

سەرۆککۆماری تورکیا باسی لەوەشکرد، "لەوەتەی نەمانی دەوڵەتی عوسمانی، موسڵمانان و کریستیانەکانی قودس، هەمیشە لەژێر چنگی ستەمدا ماونەتەوە. تاوەکو ئێستا لەسەر بنەمایەکی دادپەروەرانە هەوڵ بۆ چارەسەرکردنی پرسی فەلەستین نەدراوە، بۆیە هەمیشە ئاسایش و سەقامگیری ناوچەکە کێشەدارە. بەچارەسەرکردنی پرسی فەلەستین - ئیسرائیل ئەوسا ناوچەی رۆژهەڵاتی ناوەڕاست ئارامی بەخۆیەوە دەبینێت."

 

ئەردۆغان پێداگری لە دامەزراندنی دەوڵەتی فەلەستین بەمەرجی لکاندنی تەواوی قودس و راگەیاندنی وەک پایتەختی دەوڵەتەکە کرد و گوتی: "هەمیشە پێداگریمان لە چارەسەریی دامەزراندنی دوو دەوڵەت کردووە. دووپاتی دەکەینەوە نابێت چیدیکە پرۆژەی دامەزراندنی دەوڵەتی فەلەستین بە سنووری جوگرافیای ساڵی 1967 و پایتەختەکەی قودس دوابخرێت. ئەمە پێویستییەکە و دەبێ بکرێت. بەنیازی دابەشکردنی قودس، رۆژانە هێرش و پێشێلکارییەکان بۆ سەر مزگەوتی ئەقسا و حەرەمی شەریف زیاتر دەبێت، بەڵام قودس فەلەستینییە". 

 

سەرۆککۆماری تورکیا ئاماژەی بەوەشدا، "کە تورکیا هەمیشە رەخنە و گازەندەکانمان لە سەرجەم بۆنەکاندا دووپات کردووەتەوە. هەرچەندە جیهان بێدەنگ بووبێت، ئێمە بێدەنگ نەبووین و هەمیشە پێداگریمان لەم مافە کردووە و دەیکەین. لە سەرجەم کۆبوونەوە و دیدارەکانمان لەگەڵ برا فەلەستینییەکانمان، هەمیشە پێمان راگەیاندوون خۆیان لە توندوتیژی و هەر جۆرە رووداوێک بە دووربگرن کە ببێتە مایەی خوێنڕشتن و ئازار و نەهامەت و قوڵکردنەوەی کێشە و قەیرانەکان." 

 

گوتیشی: "بۆ کەمکردنەوەی نەهامەتییەکانی گەمارۆ بەردەوامەکانی سەر گەلی غەززە هەمیشە لە رێگەی دامەزراوە پەیوەندیدارەکانمانەوە هەوڵەکانمان بۆ کەمکردنەوەی نەهامەتییەکانیان گرتووەتەبەر. ئەمڕۆش لەسەر بنەمای کەس زیان لە ئاشتییەکی دادپەروەرانەدا ناکات، کاردەکەین و لەگەڵ هاوتا و گۆتیارەکانمان پێداگریمان لە چارەسەرکردنی پرسی فەلەستین لە چوارچێوەی یاسا نێودەوڵەتییەکاندا کردووە". 

 

لە پەیامەکەشیدا ئەوەشی خستەڕوو کە دواخستن و دواکەوتنی چارەسەرێکی دادپەروەرانە، هێندەی گەلی فەلەستین و ئیسرائیل، زیان بەهەمووان دەگات. بەتایبەتیش دیمەنەکانی گیانلەدەستدانی کۆرپەی نێو لانکەکان و منداڵانی بێتاوان، ئازاریان دەدات. توندوتیژی و شەڕ زیانی بە خەڵکی سڤیلی هەردوولایەن دەگەیێنێت.