رۆژهەڵاتی نێوەڕاست
ستیڤ ویتکۆف، نێردەی ترەمپ بۆ رۆژهەڵاتی نێوەڕات و ئەدمیراڵ براد کوپەر، فەرماندەی سێنتکۆم. رووخساری کووپەر تەڵخ کراوە.
رووداو دیجیتاڵ
نێردەی ترەمپ بۆ رۆژهەڵاتی نێوەڕاست و فەرماندەی فەرماندەیی ناوەندیی سوپای ئەمریکا (سێنتکۆم) سەردانی کەرتی غەززەیان کرد. فەرماندەکە رایگەیاند، بۆ تاوتوێکردنی سەقامگیریی دۆخی دوای شەڕ چوون و جەختیشی کردەوە کە هیچ سەربازێکی ئەمریکی لەو ناوچە فەلەستینییەدا جێگیر ناکرێن.
رۆژی شەممە ستیڤ ویتکۆف، نێردەی ترەمپ بۆ رۆژهەڵاتی نێوەڕاست و ئەدمیراڵ براد کووپەر سەردانی سەربازگەیەکی سوپای ئیسرائیلیان کرد لە کەرتی غەززە و وێنەکەیان لە تۆڕە کۆمەڵایەتییەکان دەنگی دایەوە.
ئەدمیراڵ براد کووپەر لە تۆڕی کۆمەڵایەتیی ئێکس لەبارەی سەردانەکە رایگەیاند، ئامانج لە سەردانەکەی گفتوگۆکردن بووە لەبارەی دامەزراندنی "ناوەندێکی هاوئاهەنگیی سڤیل و سەربازی" بە سەرپەرشتیی سێنتکۆم، کە "پشتگیری لە ئارامکردنەوەی ململانێکە" دەکات.
یەکەم هێزی ئەمریکی کە لە 200 سەرباز پێکهاتووە، گەیشتووەتە ئیسرائیل، بەمەبەستی یارمەتیدان لە چاودێریکردنی ئاگربەستی نێوان حەماس و ئیسرائیل لە غەززە، کە بەپێی پلانی ئاشتیی دۆناڵد ترەمپ، سەرۆکی ئەمریکا راگەیێنراوە.
سوپای ئەمریکا سەرپەرشتیی هێزێکی فرەنەتەوە دەکات، کە لە غەززە جێگیر دەبێت و پێشبینی دەکرێت هێزی وڵاتانی میسر، قەتەر، تورکیا و ئیمارات لەخۆبگرێت.
کووپەر لە پۆستەکەیدا نووسیویەتی: "کوڕان و کچانی سوپای ئەمریکا بەدەم بانگەوازێکەوە دەچن بۆ بەرقەرارکردنی ئاشتی لە رۆژهەڵاتی نێوەڕاست، وەک پشتیوانییەک بۆ فەرمانەکانی فەرماندەی گشتی [سەرۆکی ئەمریکا] لەم ساتە مێژووییەدا."
براد کووپەر لە سەرەتای مانگی ئابدا وەک فەرماندەی سێنتکۆم دەستنیشانکرا، کە فەرماندەییەکە بەرپرسە لە ئۆپەراسیۆنەکانی سوپای ئەمریکا لە رۆژهەڵاتی نێوەڕاست.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ