رووداو دیجیتاڵ
وەزارەتی کۆچ و کۆچبەرانی عێراق دەڵێت، نزیکەی 6 هەزار خێزانی عێراقی لە کەمپی هۆلی رۆژئاوای کوردستان ماون.
عەلی عەباس، گوتەبێژی وەزارەتی کۆچ و کۆچبەرانی عێراق و بەرپرسی لقەکان لە وەزارەتەکە، رۆژی شەممە، 17ی شوباتی 2024، بە تۆڕی میدیایی رووداوی راگەیاند، "تاوەکو ئێستا نزیکەی هەزار و 560 خێزانی عێراقی لە کەمپی هۆلەوە گەڕێندراوەنەتەوە؛ نزیکەی 5 هەزار و 500 بۆ 6 هەزار خێزانیش ماون بگەڕێندرێنەوە".
یەکەم کاروان لە 06-05-2021 گەڕێندرایەوە کە 95 خێزان بوون. گوتەبێژی وەزارەتی کۆچ و کۆچبەرانی عێراق گوتی، "گەڕاندنەوەی خێزانە عێراقییەکان لە کەمپی هۆلەوە بەردەوامە و بەم نزیکانە بەشێکی دیکەیان دەگەڕێندرێنەوە. ئەوان دوای وردبینی ئەمنی دەبرێنە کەمپی جدعە لە پارێزگای نەینەوا بۆ شیاندنەوە و تێکەڵکردنەوەیان بە کۆمەڵگە و دواتر دەگەڕێندرێنەوە زێدی خۆیان".
پێشتر زیاتر لە 30 هەزار هاووڵاتیى عێراقى لە کەمپى هۆل بوون کە بەشی هەرە زۆریان ژن و منداڵی چەکدارانی پێشووی داعشن. کەمپەکە دەکەوێتە شارى حەسەکەى رۆژئاواى کوردستان و لەژێر دەسەڵاتى هێزەکانى سووریاى دیموکرات - هەسەدەدایە.
بەپێی ئامارەکانی رێکخراوی نەتەوە یەکگرتووەکان، نزیکەی 55 هەزار کەسی خەڵکی وڵاتانی جیاواز لە کەمپی هۆل لە رۆژئاوای کوردستانن کە گەورەترین کەمپە بۆ کەسوکاری چەکدارانی داعش. زۆرترینی ئەوانیش عێراقین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ