رووداو دیجیتاڵ
سوپای ئیسرائیل دەڵێت، لەدوای تەواوبوونی ئاگربەستی لوبنان لە رۆژی سێشەممە، هێزەکانیان لە "پێنج خاڵی ستراتیژی"ـی وڵاتەکە دەمێننەوە. لوبنانیش ناڕازییە.
رۆژی دووشەممە، 17-02-2025، ناداڤ سۆشانی، گوتەبێژی سوپای ئیسرائیل رایگەیاند: "بە پشتبەستن بە دۆخی هەنووکەیی، ژمارەیەکی کەمی هێزەکانمان بۆ ماوەیەکی کاتی لە پێنج خاڵی ستراتیژیی سنووری لوبنان دەمێننەوە."
لەبارەی هۆکاری ئەو بڕیارە، سۆشانی گوتی: "بۆ ئەوەیە لە بەرگریکردن لە هاووڵاتییەکانمان بەردەوام بین و دڵنیابینەوە هیچ هەڕەشەیەکی راستەوخۆ نییە."
ئەو گوتەبێژەی سوپای ئیسرائیل دڵنیایی دا، "ئەمە رێوشوێنێکی کاتییە و تاوەکو هێزە چەکدارەکانی لوبنان دەتوانن رێککەوتنەکە بە تەواوی جێبەجێ دەکەن."
بەرپرسانی حکومەتی لوبنان داوایان لە ئیسرائیل کردووە بەتەواوی لە سنووری باشوور بکشێتەوە.
ئاگربەستی نێوان حیزبوڵڵا و ئیسرائیل لە 27ـی 11ـی پارەوە دەستیپێکرد، ئەمەش دوای دوو مانگ لە هێرشی چڕی ئیسرائیل بۆ سەر لوبنان و بەتایبەت حیزبوڵڵای لوبنانی.
بەگوێرەی رێککەوتنەکە، کە ئەمریکا و فەرەنسا نێوەندگیرییان کرد، پێویستە سوپای لوبنان بچێتە باشووری وڵاتەکە و لەگەڵ هێزە ئاشتیپارێزەکانی نەتەوە یەکگرتووەکان لەوێبن؛ سوپای ئیسرائیلیش لە باشووری وڵاتەکە دەکشێتەوە. ئاگربەستەکە بۆ ماوەی 60 رۆژ بوو، بەڵام تاوەکو 18-02-2025 درێژکرایەوە؛ ئەمەش واتا سبەی سێشەممە کۆتایی دێت.
لەلایەکی دیکە، حیزبوڵڵا بەگوێرەی ئاگربەستەکە دەبوو 30 کیلۆمەتر بچێتە ئەودیو رووباری لیتانی و باشوور چۆڵبکات، هەروەها هیچ ژێرخانێکی چەکداری لەوێ نەهێڵێت.
لیژنەیەک کە لە ئەندامانی ئەمریکا، فەرەنسا، لوبنان، ئیسرائیل و نەتەوە یەکگرتووەکان پێکهاتووە ئەرکی ئەوەیان پێسپێردراوە ئاگربەستەکە بە تەواوی جێبەجێ دەکرێت و هیچ پێشێلکارییەک روونادات، ئەگەر رووشبدات، پێویستە دەستنیشان بکرێت و چارەسەر بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ