رووداو دیجیتاڵ
کۆماری ئیسلامیی ئێران بە زنجیرەیەک مووشەک هێرشی کردە سەر ئیسرائیل، ئەمەش تەنیا چەند کاژێرێک دوای ئەوە هات کە بنیامین نەتەنیاهوو رایگەیاندبوو وڵاتەکەی توانیویەتی ئێران "وردوخاش" بکات.
رۆژی هەینی 20-03-2026 سوپای ئیسرائیل رایگەیاند، سێ شەپۆلی جیاوازی مووشەکییان دەستنیشان کردووە کە لە ئێرانەوە هاوێژراون. دەنگی چەندین تەقینەوەی بەهێز لە شاری ئۆرشەلیم/قودس بیسترا و زەنگی ئاگادارکردنەوە لە سەرانسەری شارەکە لێدرا.
تاوەکو ئێستا دەزگەی فریاکەوتی ئیسرائیل (ماگن دەیڤد ئادۆم) هیچ راپۆرتێکی فەرمیی لە سەر هەبوونی زیانی گیانی یان مادیی گەورە بەهۆی ئەم هێرشە نوێیەی تارانەوە بڵاونەکردووەتەوە. تیمەکانی بەرگریی ئاسمانیی ئیسرائیل خەریکی بەرپەرچدانەوەی مووشەکەکان بوون لە ئاسماندا.
ئەم هێرشە مووشەکییەی ئێران وەک وەڵامێکی خێرا دەبینرێت بۆ کۆنفڕانسە رۆژنامەڤانییەکەی ئێوارەی پێنجشەممەی بنیامین نەتەنیاهوو، سەرۆکوەزیرانی ئیسرائیل. نەتەنیاهوو گوتی: "ئێمە دەیبەینەوە و ئێران وردوخاش بووە. ئێمە ئەو پیشەسازییانەمان وێران کردووە کە مووشەکی لێ بەرهەم دەهێنرێت."
سەرۆکوەزیرانی ئیسرائیل جەختی کردەوە، "ئێران چیدی توانای پیتاندنی یۆرانیۆم و دروستکردنی مووشەکی بالیستیی نەماوە."
جەنگی نێوان ئەمریکا/ئیسرائیل و ئێران کە لە 28ـی شوباتەوە دەستی پێکردووە، ئێستا گەیشتووەتە قۆناخێکی زۆر هەستیار و سەرەڕای بانگەشەکانی ئیسرائیل بۆ سەرکەوتن، تاران بەردەوامە لە مووشەکبارانکردنی ناوجەرگەی شارەکانی ئیسرائیل.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ