سەرۆک بارزانی و تۆم باراک دۆخی سووریا تاوتوێ دەکەن

 

تۆم باراک، نێردەی ئەمریکا بۆ کاروباری سووریا لە هەژماری ئێکس بڵاویکردەوە، لەگەڵ سەرۆک مەسعود بارزانی بە تەلەفۆن قسەیان کردووە و "دۆخی سووریا، گرنگیی پاراستنی ئاگربەست و دڵنیابوونەوە لە گەیاندنی هاوکارییە مرۆییەکان بۆ ئەوانەی پێویستیانە، بەتایبەتی لە کۆبانی" تاوتوێکران.

 

نێردەی ئەمریکا بۆ سووریا لە ئێکسەکەی باسی حکومەتی داهاتووی عێراقیشی کردووە و دەڵێت، " هەڵوێستی ویلایەتە یەکگرتووەکان بە روونی دەمێنێتەوە: ئەو حکومەتەی کە لەلایەن ئێرانەوە دابمەزرێنرێت (بسەپێندرێت) سەرکەوتوو نابێت، نە بۆ خواستەکانی عێراق و سووریا بۆ داهاتوویەکی گەشتر، و نە بۆ هاوبەشییەکی کارا لەگەڵ ویلایەتە یەکگرتووەکانی ئەمریکا."

پەیوەندییە تەلەفۆنییەکەی سەرۆک بارزانی و تۆم باراک دوای ئەوە دێت، نێردەکەی ئەمریکا بۆ سووریا لە چەند رۆژی رابردوودا، دوو جار سەردانی هەرێمی کوردستانی کردووە و لەگەڵ سەرۆک بارزانی و نێچیرڤان بارزانی کۆبووەتەوە.

 

 

"ئەمشەو پەیوەندییەکی تەلەفۆنیی بەرهەمدارم لەگەڵ جەنابی مەسعوود بارزانی ئەنجامدا بۆ تاووتوێکردنی دۆخی سووریا و گرنگیی پاراستنی ئاگربەست و دڵنیابوونەوە لە گەیاندنی هاوکارییە مرۆییەکان بۆ ئەوانەی پێویستیانە، بەتایبەتی لە کۆبانی. سەبارەت بە عێراق، هەڵوێستی ویلایەتە یەکگرتووەکان بە ڕوونی دەمێنێتەوە: ئەو حکومەتەی کە لەلایەن ئێرانەوە دابمەزرێنرێت (سەپێندرێت) سەرکەوتوو نابێت، نە بۆ خواستەکانی عێراق و سووریا بۆ داهاتوویەکی گەشتر، و نە بۆ هاوبەشییەکی کارا لەگەڵ ویلایەتە یەکگرتووەکانی ئەمریکا."