رووداو دیجیتاڵ
بنیامین نەتەنیاهوو، سەرۆکوەزیرانی ئیسرائیل دەڵێت، "ئێستا گفتوگۆ دەکرێت" بۆ لەچەکداماڵینی باشووری سووریا و کردنەوەی رێڕەوێکی مرۆیی بۆ گەیاندنی یارمەتی بە شاری سوەیدای زۆرینە درووز.
نەتەنیاهوو رۆژی پێنجشەممە لەگەڵ نوێنەرانی درووزەکانی ئیسرائیل کۆبووەوە.
لە ڤیدیۆیەکدا کە نووسینگەکەی بڵاوی کردووەتەوە، نەتەنیاهوو دەڵێت: "ئەم گفتوگۆیانە ئێستا دەکرێن، لەم ساتەدا دەکرێن."
ئەم پێشهاتانە دانپێدانانێکی ناڕاستەوخۆیە بە هەبوونی گفتوگۆ لەنێوان ئیسرائیل و حکومەتی راگوزەری سووریا.
وەزارەتی دەرەوەی فەرەنسا بە ئاژانسی فرانس پرێسی راگەیاند، فەرەنسا کارئاسانیی بۆ کۆبوونەوەیەک کردووە کە رۆژی 19ی ئاب لە پاریس لەنێوان ئەسعەد شەیبانی، وەزیری دەرەوەی سووریا و رۆن دێرمەر، وەزیری کاروباری ستراتیژیی ئیسرائیل "بە نێوەندگیریی ئەمریکا" بەڕێوەچوو؛ ئەوە دووەم کۆبوونەوەی لەو شێوەیە بوو لە پایتەختی فەرەنسا، دوای یەکەم کۆبوونەوە لە 24ی تەممووز.
وەزارەتی دەرەوەی فەرەنسا گوتیشی: "ئەم هەوڵانە لە چوارچێوەی پشتیوانیمانە بۆ دیالۆگی نێوان سووریا و ئیسرائیل و بەهێزکردنی پەیوەندیی دراوسێیەتیی باش لەنێوان هەردوو وڵات، کە هۆکارێکی سەرەکیی سەقامگیریی ناوچەکەیە."
ئیسرائیل و سووریا دەیان ساڵە لە دۆخی جەنگدان.
پێشتر ئاژانسی فەرمیی هەواڵی سووریا (سانا) ئاماژەی بە کۆبوونەوەکەی پاریس کردبوو و روونیکردبووەوە کە تێیدا باسی "دۆسییەکانی تایبەت بە بەهێزکردنی سەقامگیری لە ناوچەکە و باشووری سووریا" کراوە.
ئیسرائیل مانگی تەممووزی رابردوو لە کاتی پێکدادانی نێوان درووزەکان و هێزەکانی لایەنگری دەسەڵاتی دیمەشق، دەستوەردانی سەربازیی لە سووریا کردبوو.
نەتەنیاهوو رۆژی پێنجشەممە بە ژمارەیەک لە شێخەکانی تایفەی درووزی لە ئیسرائیل گوت: "ئێستا سەرنجمان لەسەر سێ خاڵە: پاراستنی تایفەی درووز لە پارێزگای سوەیدا و تەنانەت لە ناوچەکانی دیکەش؛ دروستکردنی ناوچەیەکی لەچەکداماڵراو کە لە بەرزاییەکانی گۆلانەوە تاوەکو باشووری دیمەشق درێژببێتەوە و سوەیداش بگرێتەوە، هەروەها کردنەوەی رێڕەوێکی مرۆیی بۆ گەیاندنی هاوکاری – لە خۆراک و کەرەستەی بیناسازی و هەموو پێداویستییەک – لەگەڵ پێشکێشکردنی هاوکاریی پزیشکیی بەرفراوان."
لە لایەکی دیکەوە، ئاژانسی سانا رۆژی پێنجشەممە لە زاری سەرچاوەیەکی حکومییەوە بڵاویکردەوە کە هێزە سوورییەکان رۆژی سێشەممە لە چیای مانع "دەزگای چاودێری و سیخوڕییان" دۆزیوەتەوە، گوتیشی: "لەکاتی هەوڵدان بۆ مامەڵەکردن لەگەڵیان، شوێنەکە رووبەڕووی هێرشێکی ئاسمانیی ئیسرائیل بووەوە کە بووە هۆی کوژران و برینداربوونی ژمارەیەک کەس و تێکشکاندنی ئۆتۆمبێلی سەربازی."
ئیسرائیل ئەنجامدانی هێرشەکەی پشتڕاست نەکردووەتەوە، بەڵام یسرائیل کاتس، وەزیری بەرگریی ئیسرائیل رۆژی پێنجشەممە گوتی، هێزەکانیان "شەو و رۆژ، لە هەر شوێنێک پێویست بکات، بۆ پاراستنی ئاسایشی وڵات کاردەکەن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ