رووداو دیجیتاڵ
لە بەردەوامیی شەڕی ئەمریکا و ئیسرائیل لەگەڵ کۆماری ئیسلامیی ئێران، ئەمڕۆ هێرش کرایە سەر چەند پێگەیەکی سەربازی لە شارەکانی تاران، کەرەج و ئیسفەهان.
ئەمڕۆ دووشەممە 9ی ئاداری 2026، میدیای فەرمیی ئێران رایگەیاند، لەلایەن هاوپەیمانیی ئەمریکا و ئیسرائیلەوە هێرش کرایە سەر شارەکانی تاران، کەرەج و ئیسفەهان و دەنگی تەقینەوەی بەهێز لەو شارانە دەبیسترێت.
بەگوێرەی میدیای ئێران، هێرشی ئاسمانی کرایە سەر چەند شوێنێک لە رۆژهەڵات و رۆژئاوای شاری تاران و فڕۆکەی جەنگی بە ئاسمانی شارەکەدا دەسووڕێتەوە.
ئاژانسی هەواڵی تەسنیمی نزیک لە سوپای پاسداران دەڵێت، سیستەمی بەرگریی ئاسمانی لە هەر سێ شاری تاران، کەرەج و ئیسفەهان چالاک بووەتەوە و بەرپەرچی هێرشەکان دەداتەوە.
هێشتا دیار نییە کام شوێن لەو شارانە کراونەتە ئامانج و زیانەکانیش دیار نین.
ئەوە لە کاتێکدایە، شەڕی ئەمریکا و ئیسرائیل لەگەڵ ئێران پێ ناوەتە رۆژی 11ـیەمەوە و هیچ ئاسۆیەکیش بۆ کۆتاییهاتنی شەڕەکە دیار نییە. هاوکات هێرشەکان تەنیا دوای چەند کاژێرێکی کەم لە هەڵبژاردنی موجتەبا خامنەیی، وەکو سێیەمین رێبەری کۆماری ئیسلامیی ئێران دێن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ