رووداو دیجیتاڵ
وەزیری رێگەوبان و ئاوەدانکردنەوەی ئێران دەڵێت، هەوڵدەدرێت رێگەی ئاسنینی کرماشان - خوسرەوی لە کەمتر لە دوو ساڵدا تەواو بکرێت، گوتیشی، ''پڕۆژەکە رۆڵی بەرچاوی لە پەرەپێدانی ئاڵوگۆڕی بازرگانیمان لەگەڵ عێراق دەبێت.''
ئێوارەی پێنجشەممە 15-05-2025، فەرزانە سادق مالواجێرد، وەزیری رێگەوبان و ئاوەدانکردنەوەی ئێران سەردانی رێگەی ئاسنینی کرماشان - خوسرەوی سەر بە پارێزگای کرماشانی رۆژهەڵاتی کوردستانی کرد و رایگەیاند، ''یەکێک لە گرنگترین پڕۆژە ترانزێتییەکانە کە رۆڵی بەرچاوی لە بەستنەوەی ئێران بە عێراق و پەرەپێدانی ئاڵوگۆڕی بازرگانی و ترانزێتی کاڵا دەبێت.''
فەرزانە سادق گوتی: ''هەوڵ دەدرێت رێگەکە لە ماوەی لە کەمتر لە دوو ساڵدا تەواو بکرێت و بخرێتە خزمەت خەڵکەوە''.
بۆ تەواوکردنی پڕۆژەکە زیاتر لە 30 تریلیۆن تمەن پێویستە. بەگوتەی وەزیری رێگەوبان و ئاوەدانکردنەوەی ئێران، ''بە رەزامەندیی رێبەر، گوژمەی تەواوکردنی پڕۆژەکە لە سندووقی گەشەپێدانی نیشتمانی دابین دەکرێت''.
رێگەی ئاسنینی کرماشان - خوسرەوی بە بەستنەوەی پارێزگای کرماشان بە عێراق، کاریگەرییەکی زۆری لە پەرەپێدانی ئاڵوگۆڕی بازرگانی و گواستنەوەی زیارەتکاران بۆ مەزارگەکانی عێراق دەبێت.
درێژیی رێگەکە نزیکەی 263 کیلۆمەترە و بەشێکە لە رێگەی ئاسنینی ئەراک، کرماشان، خوسرەوی و بەغدای نێوان ئێران و عێراق کە لە ساڵی 2001ـوە کاری لەسەر دەکرێت.
کرماشان چوار دەروازەی سنووری لەگەڵ عێراق و هەرێمی کوردستان هەیە. دەروازە سنوورییەکانی پەروێزخان، شوشمێ و شێخ سڵە دەکەونە سنووری هەرێمی کوردستان و دەروازەی سنووریی خوسرەویش دەکەوێتە سەر سنووری نێوان کرماشان و ناوچەکانی دیکەی عێراق.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ