رووداو دیجیتاڵ
دوای هێرشێکی مووشەکی بۆ سەر ئیسرائیل، سوپای پاسدارانی ئێران راگەیێندراوێکی بڵاوکردەوە و دەڵێت، سیستمی بەرگریی وڵاتەکەیان تووشی ''سەرلێشێوان'' کردووە و ''ئۆپەراسیۆنەکەمان تاوەکو لەنێوچوونی یەکجارەکیی رژێمی زایۆنی بەردەوام دەبێت.''
بەرەبەیانیی ئەمڕۆ دووشەممە، 16-06-2025، سوپای پاسدارانی ئێران دوای زنجیرە هێرشێکی مووشەکی بۆ سەر حەیفا، تەلئەڤیڤ و قودس/ئورشەلیم، راگەیێندراوێکی دیکەی بڵاوکردەوە کە تێیدا باس لەوە کراوە: ''لەم ئۆپەراسیۆنەدا، بنکەکانی فەرماندەیی و کۆنترۆڵی رژێمی زایۆنی، بە شێوەیەکی نوێی هەواڵگری و بەکارهێنانی تواناکان، سیستمی بەرگریی ئاسمانیی دوژمنمان تووشی سەرلێشێواوی کرد.''
بەگوێرەی راگەیێندراوەکە، لە ئەنجامی هێرشەکەی سوپای پاسداران، سیستمە بەرگرییە ئاسمانییەکانی ئیسرائیل، تووشی هەڵە بوون و لەبری مووشەکەکانی ئێران، یەکدییان کردووەتە ئامانج.
سوپای پاسداران جەخت لەوە دەکاتەوە، ''داهێنان و تواناییە بەکارهاتووەکان لەم ئۆپەراسیۆنەدا بە شێوەیەک بوون کە سەرەڕای پشتگیریی هەمەلایەنەی ئەمریکا و زلهێزانی رۆژئاوا لە رژێمی زایۆنی و هەبوونی پێشکەوتووترین سیستمی بەرگریی ئاسمانی، زۆربەی مووشەکەکانمان سەرکەوتووانە ئامانجی خۆیان پێکا.''
لە راگەیێندراوەکەدا ئەوەش هاتووە، ''ئەو ئۆپەراسیۆنەکەمان دەرخەری ئەوە بوو کە لێکدانەوەی رژێمی زایۆنی و ئەمریکا بۆ توانای ئێران بە تەواوی هەڵەیە و دەبێت ئێستا چاوەڕوانی رووخانی رژێمی داگیرکاری زایۆنی بین.''
سوپای پاسداران هۆشداری دەدات، ''ئۆپەراسیۆنەکانمان دژی ئامانجە گرنگەکانی ئەم رژێمە ساختەیە، کاریگەرتر، ئامانجدار و بەهێزتر بەردەوام دەبێت، تاوەکو ئەوکاتەی بە تەواوی لەنێودەچێت.''
لە بەرەبەیانیی هەینی 13ـی حوزەیرانی 2025ـوە، پێکدادانی راستەوخۆی نێوان تەلئەڤیڤ و تاران دەستیپێکردووە. سەرەتا ئیسرائیل هێرشی کردە سەر چەند بنکەی ئەتۆمی و سەربازی لە ئێران و رۆژهەڵاتی کوردستان کە لە ئەنجامدا ژمارەیەک فەرماندەی سەربازی و زانای ئەتۆمی کوژران.
پاشان ئێران لە وەڵامی هێرشەکەدا ئۆپەراسیۆنی ''بەڵێن راست 3''ـی دژی ئیسرائیل راگەیاند کە تاوەکو ئێستا بە چەند قۆناخ هێرشی مووشەکی کردووەتە سەر وڵاتەکە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ