رووداو دیجیتاڵ
وەزیری کاری ئێران رایگەیاند، پلانیان هەیە لە دوو هەفتەی داهاتوودا دەست بە کۆبوونەوەکان بکەن بۆ تاوتوێکردنی زیادکردنی مووچەی ساڵی داهاتووی کرێکاران و دەڵێت، "رێژەی هەڵاوسان لەبەرچاو دەگرین."
ئەمڕۆ چوارشەممە 17-12-2025، ئەحمەد مێیدەری، وەزیری کاری ئێران لە پەراوێزی کۆبوونەوەی دەستەی وەزیرانی حکومەتی وڵاتەکە بە رۆژنامەڤانانی راگەیاند، بڕیارە لە ماوەی دوو هەفتەی داهاتوودا لەگەڵ نوێنەرانی خاوەنکاران و کرێکاران کۆببنەوە؛ ئامانج لە کۆبوونەوەکەش تاوتوێکردنی پرسی زیادکردنی مووچەی کرێکارانە بە لەبەرچاوگرتنی رێژەی هەڵاوسان و بەرزبوونەوەی نرخی کاڵا و شمەک.
بەگوێرەی یاسای کار لە ئێران، ساڵانە بەر لە هاتنی نەورۆز و ساڵی نوێی کوردی/هەتاوی، ئەنجوومەنی باڵای کار کۆدەبێتەوە بۆ دیاریکردنی کەمترین کرێی کرێکاران.
وەزیری کاری ئێران ئاماژەی بەوە کرد، لە کۆبوونەوەکاندا سەرجەم پێشنیاز و بۆچوونە جیاوازەکان دەخەنەڕوو و دوای هەڵسەنگاندن بڕیاری لەسەر دەدەن.
سەبارەت بە میکانیزمی زیادکردنەکە، ئەحمەد مێیدەری گوتی: "لە پەرلەمان یاسایەک هەیە کە داوا دەکات لانیکەم بە رێژەی هەڵاوسان مووچە زیاد بکرێت. ئێمە ئەو یاسایە لەبەرچاو دەگرین کە ئێستا لە پەرلەمان تاوتوێ دەکرێت و دوای هەڵسەنگاندنی هەموو بابەتەکان، روون دەبێتەوە کە چۆن دەتوانین پرسەکە لەگەڵ کرێکاران و خاوەنکارەکان بەرەو پێشەوە ببەین."
لە ئێران، ئەنجوومەنی باڵای کار کە لە نوێنەرانی وەزارەتی کار (حکومەت)، خاوەنکاران و نوێنەری کرێکاران پێکدێت، بڕیاری کۆتایی لەسەر مووچەی کرێکاران دەدات.
ساڵی رابردوو، دوای چەندین گەڕی دانوستاندن لەنێوان ئەندامانی ئەنجوومەنەکە، بڕیاردرا مووچەی کرێکاران بە رێژەی 45٪ زیاد بکرێت و لانیکەمی مووچەیان بە 13 ملیۆن و 400 هەزار تمەن دیاریکرا؛ بڕێک کە کرێکاران بەهۆی دابەزینی بەهای تمەن و بەرزیی هەڵاوسانەوە بە کەمی دەزانن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ