رووداو دیجیتاڵ
دوای ئەوەی ئەمڕۆ بەهۆی نەبوونی رێژەی یاسایی دانیشتنی پەرلەمانی عێراق بەڕێوەنەچوو؛ پەرلەمان بڕیاریدا بە هەمان خشتە سبەی دابنیشێت. سەرۆکایەتیی پەرلەمانیش هەڕەشە لەو ئەندامانە دەکات کە بەشداری دانیشتن ناکەن و دەڵێت، یاساکانی پەیڕەوی ناوخۆ بەرامبەر ئەو پەرلەمانتارانە جێبەجێ دەکەن بەبێ پاساو ئامادە نابن، کە سزاکەی دەگاتە هەڵوەشاندنەوەی ئەندامێتییان.
بەگوێرەی خشتەکە، دانیشتنەکە رۆژی یەکشەممە، کاژێر 01:00ـی پاشنیوەڕۆ دەکرێت.
خشتەی کارەکانی پەرلەمانی عێراق بۆ دانیشتنەکەی سبەی ئەمانەن:
یەکەم: دەنگدان لەسەر یاسای پێشنیارکراوی هەموارکردنەوەی هەمواری دووەمی یاسای دامەزراوەی زیندانیانی سیاسی ژمارە 4ی ساڵی 2015.
دووەم: دەنگدان لەسەر پڕۆژەیاسای پەسەندکردنی رێککەوتننامەی هاندان و پاراستنی دوولایەنە بۆ وەبەرهێنان لە نێوان هەردوو حکومەتی عێراق و سعودیە.
سێیەم: دەنگدان لەسەر پێشنیازەیاسای هەموارکردنەوەی یاسای یەکەمی بناخەکانی هاوتاکردنی بڕوانامە باڵاکان و بڕوانامەی ئەکادیمی عەرەبی و بیانی ژمارە (20)ی ساڵی 2020.
چوارەم: دەنگدان لەسەر پڕۆژەیاسای رێکخستنی وزەی نوێبووەوە.
پێنجەم: دەنگدان لەسەر پڕۆژەیاسای ئازادی رادەربڕین و گردبوونەوە و خۆپێشاندانی ئاشتییانە.
شەشەم: خوێندنەوەی یەکەم بۆ پڕۆژەیاسای زانکۆی عێراق بۆ زانستە ئەمنییەکان.
حەوتەم: خوێندنەوەی دووەم بۆ پڕۆژەیاسای هەموارکردنەوەی یاسای بەرگریی شارستانی ژمارە 44ی ساڵی 2013.
هەشتەم: خوێندنەوەی دووەم بۆ پڕۆژەیاسای رێکخستنی مافی قوربانییانی نەخۆشخانەی ئیبن خەتیب و قوربانییانی سەنتەری ئەلنەقا و قوربانییانی رووداوی حەمدانییە.
نۆیەم: خوێندنەوەی دووەم بۆ پێشنیازەیاسای پاراستن و باشترکردنی ژینگە.
هەر ئەمڕۆ، سەرۆکایەتیی پەرلەمانی عێراق لەدوای پەککەوتنی دانیشتنەکەی ئەمڕۆ کۆبوونەوە و لە راگەیێندراوێکدا ئاماژەیان بەوە داوە، تەواوبوونی رێژەی یاسایی ئەندامانی پەرلەمان، "بەردی بناخەیە بۆ تەواوکردنی ئەرکە دەستوورییەکان، لەپێش هەمووشیانەوە دەنگدان لەسەر ئەو یاسا و بڕیارانەی کە توێژێکی عێراق چاوەڕوانی دەکەن."
کۆبوونەوەکەدا لەنێوان، مەحموود مەشهەدانی، سەرۆکی پەرلەمان، موحسین مەندەلاوی، جێگری یەکەمی سەرۆکی پەرلەمان، شاخەوان عەبدوڵڵا، جێگری دووەمی سەرۆکی پەرلەمان و سەرۆکی فراکسیۆنەکان پەرلەمانی عێراق بووە.
بەگوێرەی نووسینگەی راگەیاندنی سەرۆکی پەرلەمانی عێراق، لە کۆبوونەوەکەدا جەخت لەسەر ئەم خاڵانەی خوارەوە کراوەتەوە:
1. پێویستیی بەڕێوەچوونی دانیشتنەکانی پەرلەمان بە رێکوپێکی، بەوپێیەی بەرپرسیارێتییەکی دەستووری و نیشتمانییە و ناکرێت دوابخرێت.
2. ئەو فراکسیۆنانەی بایکۆتی دانیشتنەکانیان کردووە بگەڕێنەوە و بەشدارییەکی کارایان هەبێت.
3. سەرۆکایەتیی پەرلەمان بڕیاردەدات بە جێبەجێکردنی پەیڕەوی ناوخۆ بەرامبەر ئەو پەرلەمانتارانەی بەبێ پاساو ئامادە نابن، تاوەکو دەگاتە هەڵوەشاندنەوەی ئەندامێتییان؛ ئەمەش لە پێناو پاراستنی کارایی دامەزراوەی یاسادانان و رێزگرتن لەو متمانەیەی خەڵک پێی بەخشیون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ