رووداو دیجیتاڵ
سەرۆکوەزیرانی عێراق رایدەگەیێنێت، تاوەکو ناوەڕاستی 2024 هیچ وەزارەت و دامەزراوەیەک نامێنێت بە پارەدانی ئەلیکترۆنی کار نەکات و دەشڵێت، "رێگە نادەین وەزارەت و دامەزراوەکان بە رێکاری کۆن بەردەوام بن."
محەممەد شیاع سوودانی، سەرۆکوەزیرانی عێراق لە کۆبوونەوەی رۆژی سێشەممە (03-01-2024)ی ئەنجوومەنی وەزیرانی عێراق قسەی بۆ وەزیرەکانی کرد و رایگەیاند، "لە حکومەتەوە رێکارەکانی پارەدانی ئەلیکترۆنی-مان دەستپێکردووە، باجەکانی حکومەت لە هەموو وەزارەتەکان چەندن و پێویستە مامەڵەکردنیان بە پارەدارکردنی ئەلیکترۆنی بێت و کۆتایی بەم بابەتە بهێنین."
سەرۆکوەزیرانی عێراق جەختی لەوە کردەوە، "رێگە نادەین وەزارەت، دەستە، دامەزراوە و پارێزگا بە رێکاری کۆن بەردەوام بن و کار بە پارەدانی کاش بکەن. هەموو رێکار، بڕیارەکان و هاندانی کۆمپانیاکان بەم ئاراستەیەن، بۆیە لە ئێستاوە تاوەکو ناوەڕاستی 2024، هیچ وەزارەت و دامەزراوەیەک نامێنێت بە پارەدانی ئەلیکترۆنی کار نەکات."
محەممەد شیاع سوودانی گوتیشی، "سەرەتا گوتمان با هەردوو بژارە بدەینە لایەنەکان بە کاش، یان POS، بەڵام ئێستا ئەمە نییە و پارەدان تەنیا دەبێت ئەلیکترۆنی بێت."
پارەدانی ئەلیکترۆنی لە رێگەی کارتی بانکییە، هاووڵاتییان دەتوانن بە شێوازی ئەلیکترۆنی کاڵا و خزمەتگوزارییەکانیان دەستەبەر بکەن. حکومەتیش لەم رێگەوە کارەکانی رایی دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ