هەڵەیەک روویدا! دووبارە هەوڵبدە
رووداو دیجیتاڵ
محەممەد حەلبووسی، سەرۆکى پارتى تەقدووم رایگەیاند: "ناکۆکى نێوان هەولێر و بەغدا بەردەوام دەبێ، ئەگەر چارەسەرێکى ریشەیی بۆ نەدۆزرێتەوە" و چەند پێشنیازێک بۆ چارەسەرى ئەو دۆخەش دەخاتەڕوو.
ئەو هەڵوێستەى محەممەد حەلبووسی، سەرۆکى پارتى تەقەدووم لە نووسینێکدا بوو کە (چوارشەممە چواری ئایارى 2025) لە تۆڕى کۆمەڵایەتى ئێکس بڵاویکردەوە.
محەممەد حەلبووسی رایگەیاند: "ناکۆکى دووبارەبووەوەى نێوان هەرێمى کوردستان و حکومەتە یەک لەدواى یەکەکانى عێراق و ئەو حکومەتانەش کە دێن، بەردەوام دەبن، ئەگەر چارەسەرێکى ریشەیی نەدۆزرێتەوە".
سەرۆکى پارتى تەقەدوومی سووننەکان تێڕوانینى خۆى بۆ چارەسەرى کێشەکانى نێوان هەولێر و بەغدا خستووەتەڕوو، لە رێگەى رێککەوتن و پابەندبوون بە چەند هەنگاوێک.
یەکێک لەو هەنگاوانەى حەلبووسی ئاماژەى پێداون ئەوەیە کە دەرهێنان، بەکارهێنان، فرۆشتن و هەناردەکردنى نەوت و گاز و سامانە سرووشتیەکان، پاراستنى سنوور و دەروازە سنوورییەکان و دیاریکردنى رسومات و پێناسى گومرگی لە دەسەڵاتى حکومەتى فیدراڵى بێت.
یەکێک لە هەنگاوەکانى دیکە کە سەرۆکى پارتى تەقەدووم باسیان دەکات ئەوەیە حکومەتى فیدراڵى بەرپرسیارێتى خەرجى گەلى عێراق و دابەشکردنى تەرخانە داراییەکانى نێو بودجە بگرێتە ئەستۆ لە وەزارەت، پارێزگا و هەرێمەکان بە گوێرەى ژمارەى دانیشتووان، لەگەڵ هەژمارکردنى ئەو رێژە سەدییەى رێککەوتنى لەسەر کراوە لەبارەى داهاتى هەرێم و پارێزگا بەرهەمهێنەرەکانى نەوت و ئەو پارێزگایانەى دەروازە سنوورییان هەیە.
ئەو پێشنیازانەى حەلبووسى لەکاتێکدان، حکومەتى فیدراڵی مووچەى مانگى ئایارى فەرمانبەرانى هەرێمى کوردستانى بە پاساوى نەمانى تەرخانى دارایی نەناردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ