هەڵەیەک روویدا! دووبارە هەوڵبدە
رووداو دیجیتاڵ
لە رۆژانی مەراسیمی عاشوورادا، لە کەربەلا 24 هەزار مەتر چوارگۆشە بە ئاوپرژێن فێنککراوەتەوە، 39 هەزار مەتر فەرش راخراوە و زیاتر لە 14 ملیۆن پەرداخ ئاو پێشکێشی زیارەتکاران کراوە.
عەتەبەی عەباسی لە شاری کەربەلا، کە سەرپەرشتیی بەشێک لە بۆنە ئایینییەکانی شیعە دەکات، رایگەیاند، بەبۆنەی عاشووراوە رووبەری 24 هەزار و 88 مەتر چوارگۆشەیان بە سیستمی پرژێنەری ئاو فێنک کردووەتەوە و 39 هەزار و 849 مەتر چوارگۆشە فەرشی سوور و نایلۆنیان راخستووە.
ئەم ساڵ لە 5ی تەممووزی 2025، یادی عاشوورا لە عێراق کرایەوە، کە یادی کوژرانی ئیمام حوسێن، دووەم ئیمامی شیعەکان و کەسوکارەکەیەتی لە شاری کەربەلا.
رۆژی یەکشەممە، 6ی تەممووزی 2025، عەلی بەدری، بەڕێوەبەری راگەیاندنی عەتەبەی عەباسی بە تۆڕی میدیایی رووداوی راگەیاند: "21 تیمی فریاگوزاری و 22 ئەمبولانس بەشدار بوون لە بۆنەکەدا و 25 تۆن دەرمانی جۆراوجۆر بۆ تیمە تەندروستییەکان دابینکراوە و خزمەتگوزارییان پێشکێش بە 22 هەزار و 535 کەس کردووە."
بەو پێیەی مەزارگەی ئیمام حوسێن لە پارێزگای کەربەلایە، زۆرترین شوێنکەوتووی ئایینزای شیعە لە عاشوورادا سەردانی ئەو پارێزگایە دەکەن.
عەلی بەدری رایگەیاند: "10 هەزار و 162 خۆبەخش بەشدارییان لە پێشکێشکردنی خزمەتگوزارییەکاندا کردووە، 320 رۆژنامەڤان و 18 کەناڵی ئاسمانییش بەشدارییان لە رووماڵکردنی بۆنەکەدا کردووە."
بەگوێرەی ئامارەکە، رۆژی عاشوورا هەشت کیلۆگرام بخورد و 40 لیتر بۆن بەکارهاتووە و 312 ئۆتۆمبێل هاووڵاتییانیان گواستووەتەوە.
بەڕێوەبەری راگەیاندنی عەتەبەی عەباسی گوتی: "لە 10 رۆژی یەکەمی مانگی موحەڕەمدا، 14 ملیۆن و 748 هەزار و 600 پەرداخ ئاو بەسەر زیارەتکاراندا دابەشکراوە و بە درێژایی رۆژانی زیارەتی عاشوورا، رۆژانە 1800 قاڵب سەهۆڵ بۆ ئەو مەبەستە بەرهەمهێنراوە".
لای شیعەکان، 27ی حوزەیران وەک یەکەم رۆژی مانگی موحەڕەم دیاریکرا و مەراسیمەکانی عاشوورا لەو رۆژەوە دەستیان پێکرد.
عەلی بەدری گوتیشی: "عاشوورا وەک چلەی ئیمام حوسێن نییە و ژمارەی زیارەتکاران هەژمار ناکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ