هەڵەیەک روویدا! دووبارە هەوڵبدە
زیارەتکارانی شیعە لە کەربەلا
رووداو - کەربەلا
هەموو ساڵێک لە چلەی کوژرانی ئیمام حوسێن و عەباس راکردنی توێریج ئەنجام دەدرێت، 10 هەزار زیارەتکار بە شین و لەخۆدان بەرەو مەزاری ئیمام حوسێن و عەباس رادەکەن و دەڵێن، "ئاڵامان بەرز کردووەتەوە و ئاوی خواردنەوەمان بۆ هێناون."
بەپێی گێڕانەوەی شیعەکان بێت، 1400 ساڵ لەمەوێش لە شەڕی تەف، ئیمام حوسێن و منداڵەکانی تینویان بووە و کەس ئاوی پێنەداون، دوای کوژرانیان هۆزی بەنی هاشم ئاویان بۆ دەبەن و ساڵانەش لە رێوڕەسمی چلەدا دووبارەی دەکەنەوە.
فازڵ رەحمان، خەڵکی نەجەف بە تۆڕی میدیایی رووداوی گوت، "ئاڵاکە جووڵێندرا لە رۆژی حەوتەمدا و ئاومان هێناوە، ئەمە درووشمی ئیمام عەباسە، بۆیە بەناوی ئەو نراوە، سەروەر و پێشەوامان ئیمام عەباس سڵاوی خوای لێبێت، ئاوی بۆ خانەوادەی ئیمام حوسێن هێنا، بۆیە حەوتی موحەڕەم بەناوی ئیمام عەباس نرا."
بە بەشداریی زیاتر لە دوو ملیۆن زیارەتکار، چلەی ئیمام حوسێن و عەباسی برای لە کەربەلا بەڕێوەچوو، نزیکەی یەک ملیۆن زیارەتکاری بیانی لە چلەی کوژرانی ئەو دوو ئیمامەدا بەشدارییان کردووە، وێڕای ماندووبوونێکی زۆر، ئومێد دەخوازن جارێکی دیکە بێنەوە کەربەلا و سەردانی ئیمام حوسێن بکەن.
موقەدەر مێهداری، زیارەتکاری ئێرانی دەڵێت، "تەنانەت لەنێو ئێرانەوە گەلە جیاوازەکان بە زاراوەی جیاوازەوە، هەموویان لەگەڵ یەکدی و بەبۆنەی خۆشەویستیی ئیمام حوسێنەوە کۆبوونەتەوە، ئەمە بۆ من سەرنجڕاکێش بوو، گەشتەکەمان زۆر سەخت بووە، کەشوهەوایەکی زۆر گەرمە و بەراورد بە هەندێک گەشتی دیکە، توانایەکی دارایی زۆر کەمیش هەیە، بەڵام سەرەڕای ئەو هەموو سەختییانەش پێم باشبووە ئەم سەردانە بکەم."
بۆ شیعە مەزهەبەکان، چلەی کوژرانی ئەو دوو ئیمامە گرنگە و دەڵێن، "بەشداریکردن لەو رێوڕەسمە، پاداشتی گەورەی هەیە و دووچاری هیچ هەنگاوێکی خراپ نابێتەوە."
عادل ئەسەدی، مامۆستا لە حەوزەی زانستیی کەربەلا دەڵێت، "بەپێی گێڕانەوەی ئیمام سادق، خوا لێی رازی بێت، کە دەڵێت: هەر کەسێک لە چلەدا زیارەتی باپیرم حوسێنی کرد و ناوی ئیمام حوسێنی هێنا و بەشداریی کارەساتەکەی کرد، هیچ هەنگاوێکی بێ پاداشت نابێت و هیچ هەنگاوێک نانێت کە خراپە بێتە رێگەی."
لە ماوەی 40 رۆژی ماتەمینیی کوژرانی ئیمام حوسێندا، زیاتر لە 22 ملیۆن زیارەتکاری بیانی و نێوخۆیی سەردانی کەربەلایان کردووە و زۆربەیان لەسەر شەقام و شۆستەکان دەمانەوە، تاوەکو بگەنە مەزارەکانی ئەو دوو ئیمامە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ