رووداو دیجیتاڵ
نووسینگەی عەلی سیستانی، مەرجەعى باڵاى شیعەکانی عێراق بڵاویکردەوە، سیستانی پێشوازی لە ژمارەیەک لە بریندارانی رووداوی تەقینەوەی پەیجەرەکانی لوبنان کردووە.
بە گوێرەی نووسینگەکەی، "ئایەتوڵڵا سەید عەلی سیستانی سوپاس و رێزی خۆی بۆ قوربانییە گەورەکانیان لە بەرگریکردن لە نیشتمان و شکۆیان دەربڕی."
نووسینگەکەی رایگەیاندووە: "لە دیدارەکەدا ئایەتوڵڵا سیستانی پێزانینی خۆی بۆ بەرخودانکاران دووپات کردەوە کە بەشێکیان لە بەرگریکردن لە خاک و شوێنە پیرۆزەکان گیانیان بەخت کردووە"؛ جەختی لەوەش کردووەتەوە، ئەو قوربانیدانانە "نموونەیەکی گەورەی خۆبەختکردن و خۆڕاگرین لەسەر پرەنسیپەکان."
لە بەرامبەردا بریندارەکان سوپاس و پێزانینی خۆیان ئاراستەی سیستانی کردووە بۆ هەڵوێست و پاڵپشتییەکانی بۆ بەرەی موقاوەمەی وڵاتەکەیان و"بەهێزیی ویستیان دووپاتکردەوە بۆ بەردەوامبوون لە بەرگریکردن لە شکۆی گەل، سەرەڕای هەموو سەختییەکان."
17 و 18ـی ئەیلوولی 2024 لە ئەنجامی تەقینەوەی هەزاران ئامێری پەیجەر و وۆکی تۆکی (بێتەل) لە سەرانسەری لوبنان، لانیکەم 37 کەس کوژران و زیاتر لە 3 هەزاری دیکەش بریندار بوون.
میدیای ئیسرائیلی بڵاویکردەوە، هەموو ئامێرێکی پەیجەر و وۆکی تۆکی کە لەلایەن حیزبوڵڵاوە بەکاردەهێنرا بە هەواڵگریی ئیسرائیلەوە بەسترابووەوە و لەو رێگەیەوەش هەواڵگریی ئیسرائیل ئاگاداری هەموو جووڵەیەکی چەکدارەکان بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ