رووداو دیجیتاڵ
گوتەبێژی وەزارەتی کارەبای عێراق رایگەیاند، ئێستا رۆژانە نزیکەی 25 هەزار مێگاوات کارەبا بەرهەم دەهێنن، بەڵام بە گشتی پێویستیان بە نزیکەی 35 هەزار مێگاوات کارەبایە. دەشڵێت: "ساڵانە دوو هەزار مێگاوات خواست لەسەر کارەبا زیاد دەکات."
د.ئەحمەد عەبادی، گوتەبێژی وەزارەتی کارەبای عێراق، رۆژی یەکشەممە، 08-10-2023، بە تۆڕی میدیایی رووداوی راگەیاند، ئێستا عێراق رۆژانە 35 ملیۆن مەتر سێجا گاز لە ئێرانەوە هاوردە دەکات، پرۆسەکە بەردەوامە و هیچ کێشەیەکی نییە کە بەشێکی بۆ بەغدا و ناوەڕاست و بەشەکەی دیکە بۆ باشووری عێراقە، لە بەگەڕخستنی وێستگەکانی بەرهەمهێنانی کارەبا بەکاردەهێنرێت.
لەبارەی توانای ئێستای بەرهەمهێنانی کارەبای عێراق، گوتەبێژی وەزارەتی کارەبا گوتی، ئێستا رۆژانە 23 - 24 هەزار مێگاوات کارەبا بەرهەم دەهێنرێت کە بە نزیکەیی بەشی هەموو عێراق دەکات، چونکە ئێستا کەشوهەواکە گونجاوە.
لە بەشێکی دیکەی قسەکانیدا، ئەحمەد عەبادی دەڵێت، لە وەرزی هاوین و زستان پێویستی کارەبا زیاددەکات، عێراق پێویستی بە 37 هەزار مێگاوات کارەبایە، ساڵانەش دوو هەزار مێگاوات خواست و پێویستی بەکارهێنانی کارەبا زیاد دەکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ