هەڵەیەک روویدا! دووبارە هەوڵبدە
رووداو دیجیتاڵ
دارا سێکانیانی، ئەندامی لیژنەی یاسایی پەرلەمانی عێراق بە تۆڕی میدیایی رووداوی راگەیاند، دانیشتنی پەرلەمان بۆ کاژێر 13:00ـی رۆژی یەکشەممە هەڵگیرا. لە دانیشتنی ئەمشەوی دا پەرلەمانی عێراق 17 مادەی پەسند کرد.
لە دانیشتنی ئەمشەوی پەرلەمانی عێراقدا، چەند جارێک دانیشتنەکە بەهۆی ناکۆکی و تێبینیی لایەنەکان لەسەر بەشێک لە مادەکان بە تایبەت مادەی 14 راگیرا، بەڵام نزیک نیوەشەو جارێکی دیکە دانیشتنەکە دەستیپێکردەوە و دەنگدان تاوەکو مادەی 41 بەردەوام بوو.
نزیک کاژێر 02:15ـی بەرەبەیانی ئەمڕۆ یەکشەممە بە بڕیاری محەممەد حەلبووسی، سەرۆکی پەرلەمانی عێراق دانیشتنەکە بۆ کاژێر 13:00ـی هەمان رۆژ هەڵگیرا.
ئەمشەو پەرلەمانی عێراق 17 مادەی لە پڕۆژەیاسای بودجە پەسند کرد. بڕگەی 8ـی مادەی 14 ناکۆکی لێکەوتەوە و پارتی رایگەیاند، یەکێتی "بە تاکڕەوی و دژی هەموو حیزبە کوردستانییەکان وەستانەوە" بۆ ئەوەی پارێزگای سلێمانی لە پارێزگاکانی دیکە جیابکەنەوە، ئەوەش "پێچەوانەی دەستوورە." دەشڵێت: ئەو بیرۆکەیەی ئەوان هەیانبوو، "بە ویستی ئەوان سەرنەکەوت و توانیمان ئامانجەکەیان لەنێوبەرین." یەکێتیش دەڵێت: هەنگاوەکەیان دەستوورییە و "گرەنتییە بۆ مووچەخۆران."
ئەو بڕگەیەی کە لە مادەی 14دا بە دڵی یەکێتی پەسند کرا و پارتی لێی ناڕازییە، دەڵێت: حکومەتی هەرێمی کوردستان پابەند دەبێت بە پێدانی ئەولەویەت بۆ دابەشکردنی مووچەی فەرمانبەران و خانەنشینانی هەرێمی کوردستان، هەروەها خەرجکردنی شایستەی وەبەرهێنانی پارێزگاکان بەپێی بنەماکانی ئەم یاسایە، بەپێچەوانەی ئەوە، لەسەر سەرۆکوەزیرانی حکومەتی فیدراڵە رێکاری پێویست بگرێتەبەر بۆ جێبەجێکردنی، لەنێویاندا "تەمویلکردن" واتە پارە راستەوخۆ بداتە پارێزگاکان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ