رووداو دیجیتاڵ
وەزارەتی کشتوکاڵی عێراق گۆڕانی دۆخی وڵاتەکەی لە قۆناخی "کەمئاوی"یەوە بۆ قۆناخی "دەگمەنیی ئاو" راگەیاند و هۆشداری دا لە لێکەوتەکانی لەسەر پلانەکانی کشتوکاڵی زستانە؛ جەختیشی کردەوە لە پێویستیی هەبوونی تیمێکی دانوستاندنکاری تەکنیکی بۆ چارەسەرکردنی قەیرانی ئاو.
رۆژی دووشەممە، د. مەهدی قەیسی، راوێژکاری وەزارەتی کشتوکاڵی عێراق بە رووداوی راگەیاند: "دۆخی ئێستای عێراق لە کەمئاوییەوە گۆڕاوە بۆ دەگمەنیی ئاو، بۆیە پێویستە تیمێکی دانوستاندنکاری تەکنیکیی پسپۆڕ هەبێت کە حکومەت، پەرلەمان، رێکخراوەکانی کۆمەڵگەی مەدەنی و دەسەڵاتی دادوەری بەشداری تێدا بکەن و بە باڵاترین دەسەڵاتی وڵاتەوە گرێدرابێ."
د. مەهدی قەیسی گوتی: "یەدەگی ئاوی کۆگاکراو بۆ کەمتر لە 10 ملیار مەتر سێجا دابەزیوە، لەکاتێکدا ساڵی 2016 بڕەکە زیاتر بوو لە 65 ملیار مەتر سێجا."
سەبارەت بە پلانی کشتوکاڵی زستانە، راوێژکاری وەزارەتی کشتوکاڵی عێراق پێشبینی ئەوەی کرد کە "پلانی زستانە کەم بێتەوە کە بە شێوەیەکی سەرەکی گەنم و جۆ لەخۆدەگرێ."
راوێژکارەکەی وەزارەتی کشتوکاڵی عێراق گوتی: "دەرفەتی زیاتر بە چاندنی گەنم بە بەکارهێنانی تەکنیکە نوێیەکانی ئاودێری دەدرێ کە ئەو تەکنیکە توانیویەتی بە رێژەی 30% بۆ 40% بەکارهێنانی ئاو کەمبکاتەوە بەراورد بە ئاودانی ئاسایی."
راوێژکارەکەی وەزارەتی کشتوکاڵی عێراق ئاماژەی بە پلانی وەزارەتەکەیان بۆ گەشەپێدانی تەکنەلۆژیای کشتوکاڵی کرد و گوتی: "هەوڵ دەدەین بەرەو کشتوکاڵی زیرەک و بەکارهێنانی تەکنیکەکانی ژیریی دەستکرد هەنگاو بنێین، بۆ پێشخستنی رەوشی کشتوکاڵ."
کێشەی کەمئاوی ساڵانێکە بەرۆکی عێراقی گرتووە. عەون زیاب، وەزیری سەرچاوەکانی ئاو رۆژی 4ی ئەم مانگە رایگەیاند: "ساڵی 2025 بە یەکێک لە سەختترین ساڵەکان دادەنرێ کە رووبەڕووی عێراق دەبێتەوە لەڕووی ئاوەوە، ئەمەش بەهۆی بەردەوامیی کەمبوونەوەی ئاوی هاتوو لە وڵاتانی سەرچاوەوە، لە سەرووی هەموویانەوە تورکیا، سەرباری زیادبوونی کاریگەریی گۆڕانکارییەکانی کەشوهەوا کە بووەتەهۆی زیادبوونی وشکەساڵی لە زۆربەی ناوچەکانی عێراق."
رۆژی شەممەش سەڵاح حاج، نوێنەری رێکخراوی فاو لە عێراق بە رووداوی گوت: "وشکەساڵیی ئەم ساڵ لە خراپترین ئاستدایە کە لە ساڵی 1933ـەوە عێراق بەخۆیەوە بینیبێتی."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ