رووداو دیجیتاڵ
وەزارەتی کشتوکاڵی عێراق بەمەبەستی پاراستنی سامانی ماسی لە وەرزی گەراداناندا، کاتەکانی قەدەخەکردنی راوکردنی ماسی لە پارێزگاکانی عێراق راگەیاند، بەرپرسێکی وەزارەتەکەش دەڵێت: "هەرکەسێک سەرپێچی بکات دەستگیر دەکرێت."
وەلید محەممەد رزوقی، بەڕێوەبەری سامانی ئاژەڵ لە وەزارەتی کشتوکاڵی عێراق، رۆژی یەکشەممە، 11-01-2026 بە تۆڕی میدیایی رووداوی راگەیاند، بە هاوئاهەنگی لەگەڵ وەزارەتی ناوخۆ و بەڕێوەبەرایەتییەکانی کشتوکاڵی پارێزگاکان لیژنە پێکهێنراوە بۆ چاودێریکردنی جێبەجێکردنی بڕیارەکە.
لەبارەی سزاکانەوە، ئەو بەرپرسەی وەزارەتی کشتوکاڵ گوتی: "هەر کەسێک لەو کاتانەی دیاریکراون سەرپێچی بکات، دەستگیر دەکرێت و رووبەڕووی سزای یاسایی دەبێتەوە، هەروەها دەست بەسەر ماسی و کەرەستەکانی راوکردنیشیدا دەگیرێت."
بڕیارەکە بەپێی یاسای ژمارە 48ـی ساڵی 1976 دەرکراوە کە تایبەتە بە رێکخستن و پاراستنی راوکردن. بەپێی بڕیارەکەش؛ راوکردن، فرۆشتن و گواستنەوەی ماسی لە سەرجەم رووبار، دەریاچە و زۆنگاوەکاندا بەپێی ناوچە جوگرافییەکان بەمشێوەیە قەدەخە دەکرێت:
ناوچەی یەکەم: پارێزگاکانی بەسرە، میسان، زیقار، موسەننا، قادسیە و نەجەف (لە 15ـی شوبات تاوەکو 15ـی نیسانی 2026).
ناوچەی دووەم: پارێزگاکانی بەغدا، دیالە، سەڵاحەدین، ئەنبار، بابل، کەربەلا و واست (لە 15ـی شوبات تاوەکو 1ـی ئایاری 2026).
ناوچەی سێیەم: پارێزگاکانی کەرکووک و نەینەوا (لە 15ـی ئادار تاوەکو 1ـی تەممووزی 2026).
وەزارەتی کشتوکاڵ ئاماژەی بەوەشکردووە، بڕیارەکە ماسیی دەریایی و ئەو ماسیانە ناگرێتەوە کە لە حەوزە مۆڵەتپێدراوەکاندا بەخێو دەکرێن وەک (کارپی ئاسایی، کارپی گیاخۆر و کارپی زیوی)، بە مەرجێک سەرچاوەکەیان بە فەرمی بسەلمێندرێت.
دیاریکردنی ئەو ماوانە بۆ قەدەخەکردنی راوکردن، بەپێی جۆری کەشوهەوای ناوچەکان و پلەی گەرمیی ئاوی دەریاچە و رووبارەکان دیاریکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ