رووداو دیجیتاڵ
شەوی رابردوو بۆ دووەمجار لەسەر یەک ئاگر لە نەخۆشخانەی زەهرای تایبەت بە منداڵان و منداڵبوون کەوتەوە.
رۆژی چوارشەممە 12-06-2024 ماهیر یاسر عەبودی، گوتەبێژی تەندروستیی نەجەف هەواڵەکەی پشتڕاست کردەوە و بە تۆڕی میدیایی رووداوی گوت، "ئاگرەکە بەهۆی شۆرتی کارەباوە بووە؛ بەڵام لەلایەن تیمەکانی بەرگریی شارستانی و کارمەندانی نەخۆشخانەکە کۆنترۆڵ کرا و هیچ زیانێکی گیانیی نەبووە."
ئەوەش لە کاتێکدا بوو، بەیانییەکەشی ئاگر لە نەخۆشخانەکە کەوتەوە و مەترسی لەسەر منداڵانی نەبەکام دروست بوو. نوئاس سەباح، هاوئاهەنگیکاری میدیایی بەرگریی شارستانیی عێراق بە رووداوی گوت، "هەوڵی خێرای تیمەکانی بەرگریی شارستانی وایکرد هیچ زیانێکی گیانی نەبێت و هەموو منداڵەکان، کە 41 منداڵ بوون، رزگار کران و سەرجەمیان تەندروستییان باشە."
د. غەسان هاتف عکایشی، بەڕێوەبەری نەخۆشخانەی زەهرا رایگەیاند، "بەهۆی شۆرتی کارەباوە ئاگر لە هۆڵی منداڵبوون کەوتەوە، سوپاس بۆ خوا بە هەوڵی هەمووان لە تیمەکانی بەرگریی شارستانی، کارمەندانی نەخۆشخانە هەموویان لە ئافرەتان و پیاوان، هاوکار بوون بۆ دەرکردنی نەخۆشەکان لە هۆڵەکە و منداڵانی نەبەکام، هیچ زیانێکی گیانیمان نەبووە."
بە گوتەی بەڕێوەبەری نەخۆشخانەی زەهرا، ئاگرەکە لەلایەن تیمەکانی ئاگرکوژێنەوە کوژێندراوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ