رووداو دیجیتاڵ
ئەمڕۆ شەممە پەرلەمانی عێراق کۆدەبێتەوە و تێیدا دوو وەزیر ئامادە دەبن و خوێندنەوەی دووەمیش بۆ سێ پڕۆژەیاسا دەکرێت و دەنگیش بە پڕۆژەیاسایەک دەدرێت.
بەپێی بەرنامەی کار کە وێنەیەکی دەست تۆڕی میدیایی رووداو کەوتووە، کاژێر 01:00ی دوای نیوەڕۆی ئەمڕۆ شەممە 12-08-2023 پەرلەمانی عێراق کۆدەبێتەوە و بەرنامەی کاریش بریتییە لە دەنگدان بە پرۆژەیاسای بەکرێدانی زەوی کشتوکاڵی.
هەر لە کۆبوونەوەکەدا وەزیرانی ناوخۆ و دارایی عێراق ئامادە دەبن.
سەگڤان سندی، جێگری سەرۆکی لیژنەی ئاسایش و بەرگریی پەرلەمانی عێراق رۆژی شەممە 12-08-2023 بە تۆڕی میدیایی رووداوی راگەیاند، هەریەک لە عەبدولئەمیر شەمەری، وەزیری ناوخۆی عێراق و تەیف سامی، وەزیری دارایی عێراق ئامادە دەبن و پەرلەمانتاران مافی ئەوەیان هەیە هەر پرسیارێکیان هەبێت، ئاراستەیان بکەن.
هەر لە کۆبوونەوەی ئەمڕۆدا خوێندنەوەی دووەم بۆ سێ پڕۆژەیاسا دەکرێت کە بریتین لە پڕۆژەیاسای پەسندکردنی هەڵگرتنی ڤیزەی دیپلۆماسی و خزمەتگوزاریی نێوان عێراق و رووسیا، پڕۆژەیاسای پەسندکردنی هەڵگرتنی ڤیزە دیپلۆماسی و خزمەتگوزاریی نێوان عێراق و قوبرس؛ هەروەها پرۆژەیاسای هەمواری 21ی یاسای ماڵ و موڵک ژمارە 25ی ساڵی 1960.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ