رووداو دیجیتاڵ
بەگوێرەی ئەنجامە نافەرمییەکان، هاوپەیمانیی ئاوەدانکردنەوە و گەشەپێدان بە سەرۆکایەتیی محەممەد شیاع سوودانی، سەرۆکوەزیرانی عێراق، لە پارێزگاکانی نەجەف و کەربەلاش لەپێش لیستەکانی دیکەوەیە.
بەگوێرەی بەدواداچوونی تۆڕی میدیایی رووداو، هاوپەیمانیی ئاوەدانکردنەوە و گەشەپێدان 3 کورسی لە پارێزگای نەجەف بەدەست دەهێنێت و بەوەش پێش لیستەکانی دیکە دەکەوێ، کە کێبڕکێیان لەسەر 12 کورسییەکەی پارێزگاکەیە.
بەپێی زانیارییەکان، هاوپەیمانیی هێزەکانی دەوڵەتی نیشتمانی 2 کورسی و هاوپەیمانیی دەوڵەتی یاسا 2 کورسی بەدەستدەهێنن. هاوکات هەریەکە لە هاوپەیمانیی ئەساسی عێراقی، بزووتنەوەی سادیقوون، ئیشراقەی کانوون، خەدەمات و ئەبشیر یا عێراق کورسییەک بەدەست دەهێنن.
لە پارێزگای کەربەلاش کە خاوەنی 11 کورسییە، هاوپەیمانیی ئاوەدانکردنەوە و گەشەپێدان 3 کورسی بەدەست دەهێنێت، دوای ئەوەی نزیکەی 70 هەزار دەنگی مسۆگەر کرد.
هاوکات، هاوپەیمانیی دەوڵەتی یاسا 2 کورسی و ئیشراقەی کانوونیش 2 کورسی بەدەست دەهێنن، دوای ئەوەی هەریەکەیان نزیکەی 50 هەزار دەنگیان هێنا.
هەروەها هەریەکە لە هاوپەیمانیی هێزەکانی دەوڵەتی نیشتمانی، هاوپەیمانیی ئەساسی عێراقی، رێکخراوی بەدر و بزووتنەوەی سادیقوون کورسییەک بەدەست دەهێنن.
رۆژی سێشەممە 11-11-2025 دەنگدانی گشتیی هەڵبژاردنی پەرلەمانی عێراق بەڕێوەچوو، کۆمیسیۆنی باڵای سەربەخۆی هەڵبژاردنەکان رایگەیاند، رێژەی بەشداریکردن لە هەڵبژاردن 55%ی تێپەڕاندووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ