ئاسمانی عێراق بەڕووی هاتووچۆی فڕۆکە داخرا

 

ئەمەش لەکاتێکدایە، دانیال هەگاری، گوتەبێژی سوپای ئیسرائیل کەمێک لەمەوبەر رایگەیاند "ئێران دەیان درۆنی لە خاکی خۆی و خاکی هێزە بەوەکالەتەکانییەوە ئاراستەی خاکەکەمان کردووە. سوپاکەمان لە رووی هێرشبردن و بەرگیرکردنەوە ئامادەیە."

 

هەروەها ئوردنیش بڕیاریداوە لەم شەوەوە، سنووری ئاسمانیی خۆی بە رووی هەموو فڕۆکەیەکدا دابخات. 

 

دەستەی رێکخستنی فڕۆکەوانیی سڤیلی ئوردن رۆژی شەممە، لە راگەیێندراوێکدا ئاماژە بەوە دەکات، بڕیاریان داوە "بە شێوەیەکی کاتی"، لە کاژێر 11:00ـی ئەمشەوەوە (13-4-2024) بە کاتی نێوخۆ، کە دەکاتە هەمان کاتی هەولێر، ئاسمانی ئوردن بە رووی هەموو فڕۆکەیەک دابخات.

 

چی روویدا؟  

دوای ئەو لێدوانەی سەرەتای هەگاری، شەپۆلی هێرشی درۆن و مووشەکەکانی ئێران بۆ سەر ئیسرائیل دەستیان پێکرد و زیاتر لە 200 درۆن و مووشەک ئاراستەی ئیسرائیل کران، بەڵام زۆربەیان بەر لەوەی بگەنە نێو خاکی ئیسرائیل تێکشکێندران. 

هێرشەکەی ئێران لە وەڵامی کوژرانی چەند بەرپرسێکی وڵاتەکە و سوپای پاسداران بوو لە هێرشێکدا بۆسەر کۆنسوڵخانەی وڵاتەکەی لە دیمەشق. 

دوای هێرشەکان بەشێک لە هاووڵاتییان لەسەر شەقامەکانی تاران ئاهەنگیان گێڕا. ئێران دەڵێت، "گرنگترین بنکەی ئاسمانیی ئیسرائیلی لە نەقەب، بە سەرکەوتوویی بووە ئامانجی مووشەکی خەیبەر. وێنە و داتاکان پێشانی دەدەن کە بنکەکە گورزێکی سەختی بەرکەوتووە."

دوای هێرشەکان سوپای پاسدارانیش لە راگەیێندراوێکدا هۆشداری دایە ئەمریکا و وڵاتانی دیکە لە ئەگەری زیانگەیاندن بە ئێران وەڵامی تووندیان دەدەنەوە. 

 

سوپای پاسداران ئەوەشی گوتووە کە، "وێڕای جەختکردنەوە لەسەر سیاسەتی دراوسێیەتی باش لەگەڵ وڵاتانی دراوسێ و وڵاتانی ناوچەکە، رادەگەیێندرێت کە لە هەر وڵاتێکەوە هەر هەڕەشەیەک لەلایەن دەوڵەتی تیرۆریستی ئەمریکا و رژێمی زایۆنی هەبێت، رووبەڕووی وەڵامێکی گونجاوی کۆماری ئیسلامی ئێران دەبێتەوە."

بەشێکی زۆر لە وڵاتان سەرکۆنەی هێرشەکەی ئێرانیان کرد و داوای دانبەخۆداگرتنیان کرد تاوەکو دۆخەکە ئارام ببێتەوە. 

ئەنتۆنیۆ گۆتێرێز، سکرتێری گشتیی نەتەوە یەکگرتووەکانیش لە راگەیێندراوێکدا ئاماژەی بەوەکرد، سەرکۆنەی ئەم هەڵچوونە مەترسیدارە دەکەم کە خۆی لە هێرشی گەورەی ئێران بۆ سەر ئیسرائیلدا دەبینێتەوە و داوای وەستاندنی دەستبەجێی ئەم دووژمنکارییانە دەکەم. 

گۆتێرێز دەڵێت، نە ناوچەکە و نە جیهانیش بەرگەی جەنگێکی دیکە ناگرن.