رووداو دیجیتاڵ
سەرۆکوەزیرانی عێراق رایگەیاند، "رێگە بەوانە نادەین هەوڵی گەڕاندنەوەی سەردەمی وێرانکاری، دڕندەیی، دیکتاتۆری و گۆشەگیری دەدەن لەژێر ناونیشانی دیکەدا."
گوتەکانی محەممەد شیاع سوودانی لەکاتی بەشداریکردنی بوو لە رێوڕەسمی دەرچووانی خولی 30ی راهێنانی پەیمانگەی باڵای گەشەپێدانی ئەمنی و کارگێڕیی وەزارەتی ناوخۆی عێراق، کە ئەمڕۆ شەممە، لە بەغدا بەڕێوەچوو.
سوودانی رووی لە ئەفسەرە دەرچووەکان کرد و گوتی، "بەرپرسیارێتیی ئێوە بەرگریکردنە لە سەروەریی عێراق و رووبەڕووبوونەوەی یاساشکێنان یان ئەوانەی یاری بە ئاسایشی نیشتمان و سەلامەتیی هاووڵاتیان دەکەن. جەختیش لەسەر خۆپڕچەککردن بە هۆشیاری، زانیاری و وریايی و بەکارهێنانی تەکنەلۆژیای پێشکەوتوو دەکەینەوە، بۆ لەباربردنی ئەو پڕۆژە تێکدەرانانەیەی کە عێراق دەکەنە ئامانج."
سەرۆکوەزیرانی عێراق ئاماژەی بەوە کرد، "حکومەتەکەمان کاری کردووە بۆ دابینکردنی پێداویستییەکانی هاووڵاتیان و رەخساندنی کەشێکی ئارام لە سەرانسەری عێراقدا، توانیشمان متمانەی نێودەوڵەتی بۆ عێراق بگەڕێنینەوە، ژینگەی ئابووری و وەبەرهێنان و هەلی کار باشتر بکەین و پڕۆژەکانی ئاوەدانکردنەوە و گەشەپێدان و ژێرخانی ئابووری دەستپێبکەین."
بڕیارە هەڵبژاردنی پەرلەمانی عێراق لە 11-11-2025 بکرێت.
سوودانی دووپاتی کردەوە، پابەندن بە ئەنجامدانی هەڵبژاردنەکان، "حکومەتیش پابەندییە داراییەکانی جێبەجێ کردووە و پشتیوانیی تەواوەتی کۆمیسیۆنی هەڵبژاردنەکان دەکات، بۆ سەرخستنی ئەم پرۆسە دیموکراسییە."
سەرۆکوەزیرانی عێراق گوتیشی، "رووبەڕووبوونەوەی گەندەڵیی کارگێڕی و دارایی لەپێشینەی کارنامەکەماندایە، بەشی زۆریشی لەڕێگەی رێکارە چاکسازی و یاساییەکانەوە جێبەجێ کراوە. دامەزراوەکانی ئاسایشی ناوخۆ، شانبەشانی هێزە نیشتمانییەکان و پشتیوانیی گەل، رۆڵێکی سەرەکییان هەیە لە پاراستنی بوژانەوەی گەشەپێدانی گشتگیری عێراقدا."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ