رووداو دیجیتاڵ
لە ئەمڕۆوە بەڕێوەبەرایەتییەکانی هاتووچۆ لە سەرجەم پارێزگاکانی عێراق بۆ تۆمارکردنی ئۆتۆمبێل بەیانیان و ئێواران دەوام دەکەن.
میقداد میری، گوتەبێژی وەزارەتی ناوخۆی عێراق، ئەمڕۆ (یەکشەممە 13-10-2024) بە تۆڕی میدیایی رووداوی راگەیاند، بە بڕیاری عەبدولئەمیری شەمەری، وەزیری ناوخۆی عێراق لە ئەمڕۆوە بەڕێوەبەرایەتیی هاتووچۆ دەوامی بەیانی و ئێوارانی دەبێت بۆ تۆمارکردنی ئۆتۆمبێل و راییکردنی مامەڵەکان لە سەرجەم پارێزگاکانی عێراق.
گوتەبێژی وەزارەتی ناوخۆی عێراق گوتی، ئەو بڕیارە بۆ کەمکردنەوەی ئەو گوشار و جەنجاڵییەیە کە لە دەوامی بەیانیان هەیە؛ ئاماژەی بەوەشکرد، ئەو کەسانەی بەیانیان دەرفەتیان نابێت، دەتوانن ئێواران مامەڵەی خۆیان رایی بکەن.
بە گوتەی عەبدولزەهرە هینداوی، گوتەبێژی وەزارەتی پلاندانانی عێراق بۆ رووداو، نزیکەی 7 ملیۆن ئۆتۆمبێلی تۆمارکراو هەن. فەرمانگەکانی دەوڵەتیش نزیکەی 300 هەزار ئۆتۆمبێلی تۆمارکراویان هەیە.
بەپێی دوایین ئاماری هاتووچۆی هەرێمی کوردستان، ملیۆنێک و 993 هەزار و 552 ئامرازی گواستنەوە تۆمارکراون، کە ملیۆنێک و 973 هەزار و 778یان ئۆتۆمبێلن و 19 هەزار و 774یشیان ماتۆڕسکیلن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ