رووداو دیجیتاڵ
دوای جەژنی نەورۆز، بڕیارە پارتی دیموکراتی کوردستان و رەوتی سەدر و هاوپەیمانی سەروەریی سوننەکان، هاوپەیمانییەک بەناوی "رزگارکردنی نیشتمان" رابگەیێنن.
شەریف سلێمان، پەرلەمانتاری فراکسیۆنی پارتی دیموکراتی کوردستان لە پەرلەمانی عێراق بە تۆڕی میدیایی رووداوی راگەیاند، هاوپەیمانی سێقۆڵی بەهێزە و بەردەوام بەهێزتر دەبێت، سەدرییەکان پێشنیازیانکردووە، هاوپەیمانی سێقۆڵی نێوان پارتی دیموکراتی کوردستان و رەوتی سەدر و هاوپەیمانی سەروەریی سوننەکان، بکرێتە هاوپەیمانی"ئینقاز وەتەن" رزگارکردنی نیشتمان.
ئەو پەرلەمانتارەی پارتی ئاماژەی بەوە کرد، هەرسێ لایەنەکە لارییان لەسەر ئەوە نییە و لە گفتوگۆکردنیش بەردەوامن.
شەریف سلێمان گوتیشی، "لەگەڵ ئەوەی هێرشە مووشەکییەکانی سەر هەولێر و سەرقاڵبوون بە لێکۆڵینەوەکانی ئەو رووداوە، گفتوگۆکان و راگەیاندنەکەی دواخست، بەڵام بڕیارە دوای جەژنی نەورۆز ئەو هاوپەیمانییە رابگەیێنرێت، دەرگەش کراوە دەبێت بەڕووی هەر لایەنێک کە بێتە نێو هاوپەیمانییەکە و بە بەرنامەکەی رازی بێت.
ئەو پەرلەمانتارەی پارتی باسی لەوەش کرد، سەدرییەکان جەخت لەوە دەکەنەوە، پێویستە قۆناخێکی تازە دەستپێبکەن بۆ ئاوەدانکردنەوەی عێراق، کۆتاییهێنان بە ناخۆشییەکان و گرفتی دارایی و ئابووری و ئاسایش، خزمەتگوزاریی پێشکێش بە خەڵک بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ