بەڕێوەبەری بەشی کوردی لە وەزارەتی پەروەردەی عێراق: رەگەزپەرستانە مامەڵەمان لەگەڵ دەکرێ

 

ئەمڕۆ دووشەممە 17-11-2025، سەنا گەرمیانی، بەڕێوەبەری گشتیی بەشی کوردی لە وەزارەتی پەروەردەی عێراق قسەی بۆ زیاد ئیسماعیل، پەیامنێری تۆڕی میدیایی رووداو کرد لە بەغدا و رایگەیاند، باڵەخانەی بەڕێوەبەرایەتییەکەیان لە ساڵی 1958ـەوە هەیە و پێویستی بە نۆژەنکردنەوەیە، بەڵام وەزارەتی پەروەردە وەڵامی داواکارییەکانیان بۆ ئەو مەبەستە ناداتەوە.

 

بەگوتەی سەنا گەرمیانی، وەزارەتی پەروەردەی عێراق "جیاکاری" لەنێوان بەشەکانی خوێندندا دەکات و ''دەمارگرژانە'' لەگەڵ بەشی خوێندنی کوردی هەڵسوکەوت دەکرێ.

 

وەک بەڕێوەبەری گشتیی بەشی کوردی لە وەزارەتی پەروەردەی عێراق گوتی، ئێستا بەڕێوەبەرایەتییەکەیان کارەبا، ئاو و ئۆتۆمبێلی نییە و ''دوایین جار ملیارێک و 181 ملیۆن دیناریان تەرخان کرد بۆ نۆژەنکردنەوەی بەڕێوەبەرایەتییەکەمان، بەڵام تاوەکو ئێستا دینارێک خەرج نەکراوە.''

 

سەنا گەرمیانی داوا دەکات لە رێگەی رووداوەوە دەنگی بە سەرۆک بارزانی بگات و دەڵێت: ''تەمەنا دەکەم، ئەم چاوپێکەوتنە ببینێت بۆ ئەوەی رزگارمان بێ لە ململانێی حیزبی و ململانێی وەزیرەکەمان، هەرچیی وەزیرێک (پەروەردە) دێت، رەگەزپەرستانە مامەڵەمان لەگەڵ دەکات.''

 

بەڕێوەبەری گشتیی بەشی کوردی لە وەزارەتی پەروەردەی عێراق ئەوەشی خستەڕوو، کێشەکانیان لەگەڵ وەزارەت ''سیاسی و رەگەزپەرستی''ـیە و ''ئەگەر هەر بەو شێوەیە بێ، بیر لە خانەنشینی دەکەمەوە.'' 

 

 

 

سەنا گەرمیانی: [باڵەخانەی] بەڕێوەبەرایەتییەکەمان لە ساڵی 1958ـوە هەیە. کارەکەی ئامادەکردنی پەرتووکی پۆلی چوار و پێنجی ئامادەیی خوێندنی کوردییە، ئامادەکردنی کولتوور و وەرگێڕان، هەرچی کتێب لە کوردستانەوە بێت بۆ بەغدا سەر بە وەزارەتی پەروەردە، ئێمە وەرگێڕانی بۆ دەکەین. ئێمە کێشەکەمان نە ئاوە نە کارەبایە، نە دەرماڵەیە و نە ئۆتۆمبێل، بەڵکو کێشەکەمان رەگەزپەرستییە، مامەڵەیەکی رەگەزپەرستانەمان لەگەڵ دەکەن، لەنێو وەزارەتەکەی خۆمان و هیچ کەسێکیش پاڵپشتیمان ناکات. نە هیچ پەرلەمانتارێک، نە هیچ حیزبێک، هیچ کەس خۆی بە خاوەنی ئێمە دانانێت. ئەمە زمانی خۆمانە، زمانی کوردیی رەسەنی خۆمان. دەبێ لە پەرلەمان یان سەرۆکایەتیی کۆمار یان لە وەزارەت، بیر بکەینەوە لە زمانەکەی خۆمان. کاری ئێمە ئەوە نییە کورد فێری زمانی کوردی بکەین، کارەکەی ئێمە ئەوەیە عەرەب فێری زمانی کوردی بکەین، چونکە بەشی خوێندنی کوردیمان هەیە لە موسڵ، لە بەسرە، لە نەجەف، لە زیقار و هەموو پارێزگاکان، جگە لە بەغدا، لە بەغداش شەش بەشمان هەیە؛ کەرخی یەکەم، کەرخی دووەم، کەرخی سێیەم، رەسافەی یەکەم، رەسافەی دووەم، رەسافەی سێیەم.

 

لە هەموو عێراقیش 15 پارێزگامان هەیە و هەر 15 پارێزگاکە بەڕێوەبەری بەشمان هەیە، کارمەند و مامۆستای خوێندنی کوردیی باشمان هەن. هەموویان تایبەت بە بەشەکانی خۆیانن، بەشی کوردییان تەواو کردووە.

 

سەنا گەرمیانی: هەموویان عەرەبن، بە دەگمەن ئەگەر کوردیان تێدا بێ. نا کوردی نازانن، بەڵام رێزمانی کوردی دەزانن. ئێستا بۆ زمانی ئینگلیزی، خۆ هەموویان بەریتانی نین، بەڵکو هەموویان عەرەبن، بەڵام رێزمانی ئینگلیزی دەزانن. مامۆستاکانی کوردیش رێزمان دەزانن و بگرە لە کوردەکان باشترن، بەڵام بە کوردی ناتوانن قسە بکەن و هەندێک کێشەیان هەیە.

 

 

سەنا گەرمیانی: بێگومان لە ناوچەکانی باشوور زیاتر، چونکە لە بەغدا هەموو قوتابخانەکانمان مامۆستای کوردییان تێدایە، تەنیا ناوچەکانی باشوور با بڵێین سەماوە، لەوێ نزیکەی 47 مامۆستامان هەیە لە سەماوە، بەڵام هەموو قوتابخانەکانیان پڕنەکردوونەتەوە. مامۆستای کوردی قوتابخانەیەکی تایبەتی بۆ دیاریکراوە بۆ وانە گوتنەوە و دەوامی بۆ تەواوکردنی رێژەی پێویستـیشی هەیە. بۆ نموونە هەندێک هەن لە دوو یان سێ قوتابخانە رێژەی پێویستی پڕ دەکەنەوە.

 

 

سەنا گەرمیانی: پۆلی چواری ئامادەیی دوو پشک لە هەفتەیەکدا و پۆلی پێنجی ئامادەیی یەک پشک.

 

 

سەنا گەرمیانی: دوایین نووسراو ئێستا لەنێو بەشی گەندەڵی دانراوە، دوایین جار ملیارێک و 181 ملیۆن دیناریان تەرخان کرد بۆ نۆژەنکردنەوەی بەڕێوەبەرایەتییەکەمان. پارەکە چی لێدێت گواستنەوەی بۆ دەکەن، وەزیری چی لێدەکات، خۆیان دەزانن، بەڵام دینارێک خەرج نەکراوە بۆ بەڕێوەبەرایەتییەکەمان.

 

 

سەنا گەرمیانی: ئەگەر پلەی وەزیفی هەبێ، خۆزگە دەخوازین.

 

 

سەنا گەرمیانی: داوامان کردووە، بەڵام هیچ کەس پلەی وەزیفیمان ناداتێ.

 

 

سەنا گەرمیانی: هۆکاری کێشەکەی ئێمە رەگەزپەرستی و سیاسییە. لەوە زیاتر قسە ناکرێ.

 

 

سەنا گەرمیانی: بردوومانەتە سەر، چارەسەرێکی دیکە نییە. ئێستا من بیر لە خانەنشینبوون دەکەمەوە، ئەگەر هەر بەو شێوەیە بێ،  چونکە هیچ کەسێک نایەوێت گواستنەوەم بۆ جێبەجێ بکات. هیچ کەسێک بابەتەکە چارەسەر ناکات، ناچارم خانەنشین بم.

 

 

سەنا گەرمیانی: تەنیا کوردی وایە، چونکە بەڕێوەبەری گشتیی تورکمانیمان هەیە، بەرەی تورکمانی پاڵپشتییان دەکەن، بەشی سریانیمان هەیە کەنیسە پاڵپشتییان دەکات. بێگومان بۆ کارەکانیان کەنیسە زۆر زۆر پاڵپشتە. هەر ئێمەین کەس پاڵپشتیمان ناکات.

 

 

سەنا گەرمیانی: بێگومان جەنابی سەرۆک مەسعود، تەمەن درێژ بێ، تەمەننا دەکەم، تەمەننا دەکەم ئەم چاوپێکەوتنە ببینێت. بۆ ئەوەی رزگارمان بێ لە ململانێی حیزب و ململانێی وەزیرەکەمان، هەرچیی وەزیرێک (پەروەردە) دێت رەگەزپەرستانە مامەڵەمان لەگەڵ دەکات. دوایین کێشە کە دروست بوو، وەزیر بۆ هەموو بەڕێوەبەرە گشتییەکان ئۆتۆمبێلی 2025ـی دابەش کرد، تەنیا بۆ بەڕێوەبەرایەتیی ئێمە نەیدا، چونکە نە خۆم ئۆتۆمبێلم هەیە، نە جێگرەکەم ئۆتۆمبێلی هەیە، نەوەک تەنیا ئۆتۆمبێل، بەڵکو هیچ شتێکمان نییە. لە هەموو ئیمتیازێک بێبەش کراوین.