رووداو دیجیتاڵ
حکومەتی عێراق، 5 ملیۆن دینار دەداتە هەر خێزانێکی ئاوارە کە بگەڕێتەوە زێدی خۆی و بڕیارەکەش لە ساڵی نوێ جێبەجێ دەکرێت.
سۆران عومەر، ئەندامی لیژنەی کۆچ و کۆچبەران لە پەرلەمانی عێراق، رۆژی یەکشەممە، 17-12-2023، بە تۆڕی میدیایی رووداوی راگەیاند، "حکومەتی عێراق لیژنەیەکی باڵای بۆ داخستنی کەمپی ئاوارەکان و گەڕانەوەی ئارەزوومەندانەی ئاوارەکان لە هەرێمی کوردستانەوە بۆ زێدی خۆیان پێکهێناوە."
سۆران عومەر گوتی، "لیژنە حکومییەکە بڕیاریداوە هەر خێزانێکی ئاوارە بگەڕێتەوە، 5 ملیۆن دینار پێبدرێت وەک هاندانێک بۆ گەڕانەوەیان، بڕیارەکەش دوای سەری ساڵ جێبەجێ دەکرێت."
ئەندامەکەی لیژنەی کۆچ و کۆچبەران لە پەرلەمانی عێراق راشیگەیاند، هاوکاری رێکخراوەکان بۆ ئاوارەکان بڕاوە کە ئێستا تەنیا لە هەرێمی کوردستان 24 کەمپی ئاوارەکان ماون، زۆربەیان ئاوارەکانی قەزای شنگالن.
نزیکەی 35 هەزار و 500 خێزانی ئاوارە لە هەرێمی کوردستان ماون کە دەکاتە زیاتر لە 664 هەزار کەس، 490 هەزاریان لە دەرەوەی کەمپەکانن و زیاتر لە 174 هەزار ئاوارەش لە 24 کەمپدا نیشتەجێن، ئەو ئاوارانە بەهۆی شەڕی داعشەوە زێدی خۆیان جێهێشتووە و تائێستاش لەبەر نالەباری ئابووری، کۆمەڵایەتی و ئەمنی نەیانتوانیوە بگەڕێنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ