لیژنەی جێبەجێکردنی رێککەوتنی ئەمنیی عێراق و ئێران: گرووپە ئۆپۆزیسیۆنەکان چەککران

 

لیژنەی باڵای جێبەجێکردنی رێککەوتنی ئەمنیی هاوبەش، رۆژی 19ی ئەیلوولی 2023 راگەیێندراوێکی بڵاوکردەوە و دەڵێت، "لەسەر بنەمای پابەندبوونی کۆماری عێراق و کۆماری ئیسلامیی ئێران بە بەندەکانی رێککەوتننامەی ئەمنیی هاوبەش و لە رێگەی هەوڵی هاوبەشی حکومەتی فیدراڵی و حکومەتی هەرێم و لیژنەی باڵای هاوبەشی نێوان هەردوو وڵات، بارەگاکانی گرووپە ئۆپۆزیسیۆنەکانی ئێران لە نزیک سنووری ئێران بە تەواوی چۆڵکران و بۆ ناوچەیەکی دوور لە سنوور دوورخرانەوە و لە چەکیش داماڵدران. هەروەها هێزی پاسەوانیی سنوور لەو ناوچانە بڵاوکرانەوە و بە هەمیشەیی جێگیر کران و ئاڵای عێراقی بەرزکرایەوە."

 

لە بەشێکی دیکەی راگەیێندراوەکەدا هاتووە، نوێنەری سکرتێری گشتیی نەتەوەیەکگرتووەکان لە کۆبوونەوەی هەولێر و بەغدا ئامادەبوو و پشتیوانیی تەواوی خۆی بۆ حکومەتی عێراق دەربڕی لە جێبەجێکردنی بڕگەکانی رێککەوتن کە لێڤەگەڕێکە بۆ چارەسەرکردنی ناکۆکی و هەر پێشلکردنێک کە روودەدات. 

 

راگەیێندراوە هاوبەشەکە دەڵێت، "دیالۆگ تاکە رێگەی گونجاوە بۆ چارەسەرکردنی هەر کێشە و ناکۆکییەک بۆ بەهێزکردنی پەیوەندیی نایاب و گەورە کە گەلەکانمان تێیدان و داستانی زیارەتی چلەش باشترین نموونەیە."

 

لە کۆتایی راگەیێندراوەکەدا ئاماژە بەوەکراوە، "ئەوەی بەدیهاتووە دەرهێنانی ئەو گروپانەیە لە ئەشکەوت، مۆڵگەکانی نزیک سنوور و گواستنەوەیانە بۆ ناوچەیەکی دوورتر کە هەنگاوێکی گرنگ و گەورەیە، بەرپرسیاریەتی پاراستن و تەواوکردنی جێبەجێکردنی قۆناخەکانی دیکەی رێککەتنەکەمان دەخاتە ئەستۆ"؛ داواش لە هەموو لایەنەکان دەکەن دوورکەونەوە لە لێدوانی نەرێنی و پشتیوانی کاری هاوبەش و هاوکاری بەردەوام بن کە لە بەرژەوەندی هەردوو وڵاتە.

 

رۆژی 19ی ئاداری 2023 عەلی شەمخانی، سکرتێری ئەوکاتی ئەنجوومەنی باڵای ئاسایشی نیشتمانیی ئێران و قاسم ئەعرەجی، راوێژکاری ئاسایشی نیشتمانیی عێراق لە بەغدا رێککەوتنی ئەمنیی نێوان هەردوو وڵاتیان واژۆ کرد و یەکێک لە خاڵەکانی تایبەت بوو بە دوورخستنەوەی هێزەکانی رۆژهەڵاتی کوردستان لە سنووری نێوان هەرێمی کوردستان و رۆژهەڵاتی کوردستان.