رووداو دیجیتاڵ
سەرۆکوەزیرانی عێراق دەڵێ، ئەرکی هێزەکانی هاوپەیمانان لە بنکەی هەریر لە مانگی ئەیلوولی داهاتوو کۆتایی دێت؛ ئاماژە بەوەش دەکات، سەقامگیریی سووریا کاری لەپێشینەی نیشتمانی و ناوچەیی عێراقە.
بەگوێرەی راگەیێندراوی نووسینگەکەی، محەممەد شیاع سوودانی، سەرۆکوەزیرانی عێراق، ئەمڕۆ سێشەممە، 20-1-2024، ئەو قسانەی لە کۆبوونەوەیەکدا لەگەڵ باڵیۆزانی وڵاتانی یەکێتیی ئەورووپا لە عێراق کرد و گوتی: "عێراق بنکەی سەربازیی عەین ئەسەدی بە تەواوی وەرگرتووەتەوە و ژمارەی راوێژکارانیش بە شێوەیەکی بەرچاو کەم بوونەتەوە. ئەرکی هێزەکانی هاوپەیمانان لە بنکەی هەریر لە هەولێر، لە مانگی ئەیلوولی ئەم ساڵ بە تەواوی کۆتایی دێت."
عێراق و هەرێمی کوردستان نزیکەی 618 کیلۆمەتر سنووری هاوبەشیان لەگەڵ سووریا و رۆژئاوای کوردستان هەیە.
سەبارەت بە دۆخی سووریا، محەممەد شیاع سوودانی نیگەرانیی خۆی دەربڕی و گوتی: "سووریایەکی سەقامگیر و یەکگرتوو کە هەموو پێکهاتەکانی تێیدا بژین، گەرەنتییەکی سەرەکییە بۆ ئاسایشی ناوچەکە. پێویستە پرۆسەیەکی سیاسیی شەفاف هەبێت لە سووریا کە هەموو لایەنەکان بگرێتەوە. سەقامگیریی سووریا کاری لەپێشینەی نیشتمانی و ناوچەیی عێراقە."
سوودانی دڵنیایی دا کە سنوورەکانی عێراق پارێزراون و هێزە ئەمنییەکان لە ئامادەیی تەواودان بۆ رووبەڕووبوونەوەی هەر مەترسییەک.
لە بەشێکی دیکەی قسەکانیدا، محەممەد شیاع سوودانی گوتی، عێراق لە پەیوەندیدایە لەگەڵ کۆماری ئیسلامیی ئێران و ویلایەتە یەکگرتووەکانی ئەمریکا بۆ ئەوەی لە بەغدا گفتوگۆ بکەن.
سەرۆکوەزیرانی عێراق باسی لەوەش کرد، لە سێ ساڵی رابردوودا حکومەت چاکسازیی گرنگی لە کەرتە جیاوازەکان کردووە و ژینگەیەکی لەباری بۆ وەبەرهێنانی بیانی رەخساندووە، ئاماژەی بەوەشکرد، بنەمای "چەک تەنیا بە دەستی دەوڵەت" بووەتە جێگەی کۆدەنگیی نیشتمانی و تەنیا گفتوگۆ لەسەر کات و میکانیزمەکەی ماوە.
هەر لە دیدارەکەدا سوودانی ئاماژەی بەوە کرد، هەڵبژاردنی ساڵی 2025ی پەرلەمانی عێراق وەرچەرخانێکی گرنگ بوو لە مێژووی سیاسیی عێراقدا، بەهۆی بێگەردییەکەی و بەشدارییە کاریگەرەکەی خەڵک.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ