سەرۆکی لیژنەکانی ئەنجوومەنی پارێزگای نەینەوا دابەشکران و یەکێتی و پارتی سەرۆکایەتیی چوار لیژنە دەکەن

 

 

ئەنجوومەنی پارێزگای نەینەوا تاوەکو درەنگی شەوی 18ـی مانگ دوور لە چاوی میدیا کۆبووەوە، دابەشکردنی سەرۆکایەتیی لیژنەکانی نێو ئەنجوومەنی نەینەوای پەسند کرد.

 

دواتر، محەممەد عەبدوڵڵا جبووری، جێگری سەرۆکی ئەنجوومەنی پارێزگای نەینەوا لەگەڵ بەشێک لە ئەندامانی ئەنجوومەنەکە کۆنگرەیەکی رۆژنامەڤانییان رێکخست و نێوەڕۆکی دانیشتنەکەی روونکردەوە.

 

جبووری گوتی، "ئەنجوومەنی پارێزگای نەینەوا کۆبوونەوەی ژمارە حەوتی خۆی کرد، دانیشتنەکە لە دوو بڕگە پێکهاتبوو، یەکەم: دەنگدان لەسەر سەرۆکایەتیی لیژنەکان. بڕگەی دووەم: هەموارکردنی مادەی 36- حەوتەم لە پەیڕەوی نێوخۆی ئەنجوومەنەکە، کە بەم شێوەی لێدێت، سەرۆکایەتیی لیژنەکان بە زۆرینەی رەهای ئەندامانی ئەنجوومەن دوای ساڵێک لە رێککەوتی دروستبوونیان هەڵدەوەشێننەوە، ئەوکات دەکرێت سەرۆکایەتیی لیژنەکان بگۆڕدرێن."

 

ئەنجوومەنی پارێزگای نەینەوا لە 20 لیژنە پێکهاتووە، بەپێی پەیڕەوی ناوخۆ هەر لیژنەیەک نابێت لە سێ ئەندام کەمتر و لە پێنج زیاتر بێت. بڕیارەکانی لیژنەکان بە زۆرینە دەدرێن، لە دوو رۆژی داهاتوودا گفتوگۆکان بۆ دابەشکردنی ئەندامان بەسەر لیژنەکان دەستپێدەکات.

 

لیژنەی یاسایی: سەعدون مکەیف، سەرۆک.

لیژنەی ئاوەدانکردنەوە و نیشتەجێکردن: حەسان عەباسی، سەرۆک.

لیژنەی وەرزش و لاوان: سارە جبووری، سەرۆک.

 

لیژنەی کشتوکاڵ و سەرچاوەکانی ئاو: ئەحمەد نازم دووبەردانی، سەرۆک.

لیژنەی مافی مرۆڤ و رێکخراوەکانی کۆمەڵگەی مەدەنی: ئێریڤان مەهدی، سەرۆک.

 

لیژنەی ئاسایش: محەممەد جاسم کاکەیی، سەرۆک.

لیژنەی رۆشنبیریی و گەشت و گوزار و شوێنەرار: ویسام سالم، سەرۆک.

 

لیژنەی پلاندانانی ستراتیژی: ساجیدە ئەفەندی، سەرۆک.

لیژنەی کاروباری قەزا و ناحیەکان: مەحموود خەلەف جبووری، سەرۆک. 

 

لیژنەی پەروەردە و خوێندن: سەبهان حەدیدی، سەرۆک.

لیژنەی ئەوقاف و کاروباری ئایینی: سومەیە خابووری، سەرۆک.

 

لیژنەی دارایی و ئابووری: عەبدوڵڵا ئەسیل نوجێفی، سەرۆک.

 

لیژنەی وزە: ئەحمەد عەبد رەبە، سەرۆک.

 

لیژنەی تەندروستیی و ژینگە: هەیدل معماری، سەرۆک.

 

لیژنەی خزمەتگوزاریی و کاروباری شارەوانییەکان:  لیلیال محەممەد عەلی، سەرۆک.

 

لیژنەی دەستپاکی: مەروان تائی، سەرۆک. 

 

لیژنەی وەبەرهێنان: مەروان زێدان، سەرۆک.

 

 

لیژنەی پیشەسازیی و سامانە سروشتییەکان: رەبیع یوسف ئیلیاس، سەرۆک. 

 

لیژنەی قەرەبووکردنەوە و ئاوارە و شوێن بزربووان: محەممەد عارف شەبەکی، سەرۆک. 

 

لیژنەی کار و کاروباری کۆمەڵایەتی و خێزان و منداڵ: عێدان شیڤان، سەرۆک.  

 

ئەنجوومەنی پارێزگای نەینەوا لە 29 ئەندام پێکهاتووە کە سێیان کۆتان (کریستیان، کوردانی ئێزدی و شەبەک). پارتی دیموکراتی کوردستان چوار ئەندام و یەکێتیی نیشتمانیی کوردستان سێ ئەندامی لە ئەنجوومەنەکەدا هەیە.

 

رۆژی 5ی شوباتی 2024، لە یەکەم دانیشتنی ئەنجوومەنی نوێی پارێزگای نەینەوادا، عەبدولقادر دەخیل، بە زۆرینەی دەنگ بە پارێزگاری نەینەوا هەڵبژێردرا؛ ئەحمەد حاسوود، بە سەرۆکی ئەنجوومەن و محەممەد جبووری، بە جێگری سەرۆکی ئەنجوومەنی پارێزگای نەینەوا هەڵبژێردران.

 

رۆژی 10ی شوباتی 2024 سیروان رۆژبەیانی، بەربژێری پارتی دیموکراتی کوردستان بە جێگری یەکەمی پارێزگاری نەینەوا هەڵبژێردرایەوە؛ هەروەها عومەر نامیق، مۆڵە لە لیستی ناسنامەی نیشتمانی بە سەرۆکایەتیی رەیان کلدانی، بە جێگری دووەمی جێگری پارێزگاری نەینەوا هەڵبژێردرا.

 

ئەنجوومەنی پارێزگای نەینەوا 29 کورسی هەیە، لەو ژمارەیە لە هەڵبژاردنی 18ـی کانوونی یەکەمی 2023، فراکسیۆنی نەینەوا لیئەهلیها 5 کورسی، پارتی دیموکراتی کوردستان 4 کورسی، هاوپەیمانیی عەقدی نیشتمانی و سیادە 3 کورسی، هاوپەیمانیی تەقەدووم 2 کورسی، حەسمی نیشتمانی 2 کورسی، هاوپەیمانیی حەدبا 2 کورسی، هەویەی وەتەنی 2 کورسی، ئتیحاد ئەهل نەینەوا 2 کورسی، عەزمی عێراق و حیزبی وەتەنی تەجدید یەکی کورسییەکیان بەدەستهێنا، جگە لەو سێ کورسییەی بۆ پێکهاتەکانی شەبەک، ئێزدی و کریستیان تەرخانکرابوو.