هەڵەیەک روویدا! دووبارە هەوڵبدە
رووداو دیجیتاڵ
موقتەدا سەدر، سەرۆکى رەوتى نیشتمانیى شیعە پەیامێکى شەش خاڵى لەبارەى هۆکارەکانى بایکۆتکردنى هەڵبژاردنى پەرلەمانى عێراق بڵاودەکاتەوە و دەڵێ: "لە کار و پێشینەى بەربژێرەکان وردبنەوە، پێش ئەوەی تۆمەت بۆ کەسانی دیکە دروست بکەن، چونکە هەندێکیان بەعسی بوون."
ئەو پەیامەى سەرۆکى رەوتی نیشتمانیى شیعە لە رێگەى راگەیێندراوێکی ساڵح محەممەد عێراقى بڵاوکرایەوە کە بە وەزیرى سەدر ناسراوە.
بنەماى پەیامەکە ئەوەیە کە پرسیار لە لایەنگرانى ئەو رەوتە کراوە بۆچى بایکۆتى هەڵبژاردن دەکەن، موقتەدا سەدر بەو شەش خاڵە وەڵامى داوەتەوە.
موقتەدا سەدر لە یەکێک لە خاڵەکاندا دەڵێ: ئەگەر پێشتر لایەنەکانى دیکە بایکۆتکردنى 75 پەرلەمانتارى رەوتەکەیان کردبێ، ئەمڕۆ ئەوانیش ( رەوتى نیشتیمانى شیعە) ئەوان بایکۆت دەکەن و دەڵێت:" ئەگەر ئەوان بڵێن بایکۆتکردنی سیاسییەکانی شیعە حەرامە، کەواتە بایکۆتکردنی 75 پەرلەمانتارەکەش حەرام بوو".
لە ساڵى 2022 لایەنەکانى هاوپەیمانیى چوارچێوەى هاوئاهەنگى شیعە رێگەیان نەدا موقتەدا سەدر بە زیاتر لە 70 پەرلەمانتارەوە حکومەت پێکبهێنێت و بەشدارى کۆبوونەوەى پەرلەمانیان نەکرد. ئەو رەوتە ناچار بوو وەک کاردانەوەیەک پەرلەمانتارەکانی بکشێنێتەوە.
موقتەدا سەدر بە لایەنگرانى دەڵێت: "ئەگەر پێتان بڵێن ئێوە شیعە نین، ئێمەش دەڵێین کەواتە بۆچی دەنگەکانمانتان دەوێ؟"
رەوتى نیشتمانیى شیعە بڕیاری داوە بەشدارى هەڵبژاردنى 11ى تشرینى دووەمى ئەم ساڵى پەرلەمانى عێراق نەکات، وەک چۆن بایکۆتى هەڵبژاردنى ساڵى 2023ى ئەنجوومەنى پارێزگاکانى کرد.
موقتەدا سەدر دەڵێت: "لەنێو پرۆسەی سیاسى و هەڵبژاردن چاکسازییمان تاقی کردەوە، بەڵام گوێیەکی وشیارمان بەدى نەکرد، ئەمڕۆ چاکسازی لە دەرەوەی پرۆسەی سیاسی تاقیدەکەینەوە".
لە خاڵەکانى دیکەى موقتەدا سەدردا هاتووە: "چۆن دەنگ بدەینە کەسێک کە دەڵێت ئێمە خاوەنی ئەجێندای دەرەکین؟ چۆن دەنگ بدەینە کەسێک کە گومان دەکرێ وەک لە تۆمارە دزەپێکراوەکانیدا دەرکەوتووە بیەوێ بمانکوژێ و هێرشمان بکاتە سەر لە نەجەف؟! یان دەنگ بدەینە کەسێک پاڵاوگەی بێجیی لێکهەڵوەشاند".
سەرۆکى رەوتى نیشتمانیی شیعە ئاماژەى بەوەداوە، ئەگەر مەبەستیان لە بێسوودیی بایکۆت، بایکۆتکردن بێ، بێ هەبوونی فراکسیۆن و پەرلەمانتار، ئەو کاتە (لە ئەگەری بەشداریکردن لە هەڵبژاردن) رەوتی نیشتمانیی شیعە تۆمەتباردەکرا بە "پەکخستنی پێکهێنانی حکومەت، درێژەدان بە ناکۆکییەکان، سووتاندنی نەخۆشخانەکان و سندووقەکانی دەنگدان و بۆردوومانکردنى براکانمان لە هەولێر و ئەنبار."
لە خالێکى دیکەدا هاتووە: "ئەگەر مەبەستتان بایکۆتکردنیانە بە دەنگدان بە ئێوە، ئەوا ئێمە گوتوومانە هەر کەسێک بەرنامەیەکی نیشتمانی هەبێت بێ پاشکۆیەتی و ملکەچی و چەکی بێسەروبەر و میلیشیا، دەنگی پێدەدەین، بەڵام تاوەکو ئەمڕۆ هیچ وەڵامێک لەوبارەیەوە نییە".
موقتەدا سەدر ئاماژەى بەوەداوە کە ئەگەر نەیارانیان وایان تێبگەیێنن کە بایکۆتکرنى هەڵبژاردن واتە گەڕانەوەى بەعسییەکان ئەوا "لە کار و پێشینەى بەربژێرەکان وردبنەوە، پێش ئەوەی تۆمەت بۆ کەسانی دیکە دروست بکەن، چونکە هەندێکیان بەعسی بوون.. کەواتە ئێوە گەڕاندووتاننەوە نەوەک ئێمە".
لەپەیامەکەدا ئاماژە بەوەدراوە کە جێگرەوەی بایکۆت، چاکسازیی گشتگیر و گۆڕینی کەس و عەقڵیەتەکانە بۆ رزگارکردنی عێراق بە رێگەی سیاسی و یاسایی بەبێ دەستوەردانی دەرەکی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ