سوودانی لە نیویۆرکەوە داوا لە وڵاتان دەکات رێز لە سەروەریی عێراق بگرن

 

 

لە 78ـەمین کۆبوونەوەی کۆمەڵەی گشتیی نەتەوە یەکگرتووەکان، محەممەد شیاع سوودانی گوتاری عێراقی خوێندەوە. باسی ژیانی خەڵک، چارەسەرکردنی کێشەکانی هەولێر و بەغدا، رووبەڕووبوونەوەی گەندەڵی، پرسی ئەمنی و سەروەریی خاکی عێراق و گۆڕانی کەشوهەوای کرد.

 

 

سەرۆکوەزیرانی عێراق لە گوتارەکەیدا رایگەیاند، رووبەڕووی گەندەڵی دەبنەوە و دەستیان بە دەستگیرکردنی گەندەڵکاران کردووە. هەروەها کار دەکەن بۆ باشترکردنی ژیانی خەڵک.

 

بە ئاماژەکردن بە راپۆرتی دامەزراوە نێودەوڵەتییەکان لەبارەی تەشەنەکردنی گەندەڵی لە عێراق، سوودانی سودانی گوتی، "پشکنینمان بۆ ئەم نەخۆشییە کرد و ناوی (پەتای گەندەڵی)مان لێ نا و بەرەنگاربوونەوەیمان کردە کاری هەرە لەپێشمان. هەروەها دەستمان بە بەداواداچوونی داواکاران کرد لە هەر کوێیەک بووبن، لە هەر پێگەیەکدا بووبن و سەر بە هەر لایەنێک بووبن و رادەستی یاسای عێراقمان کردن بۆ ئەوەی ئەو نەخۆشییە لەنێوببەین."

 

هەر لەوبارەیەوە و لە بەشێکی دیکەی گوتارەکەیدا، سەرۆکوەزیرانی عێراق داوای لە وڵاتانی دۆست و هاوبەشیان کرد، "دەستی یارمەتیمان بۆ درێژ بکەن بۆ بەرەنگاربوونەوەی گەندەڵی، لە هەموو قۆناخەکانیدا، هەروەها ئاسانکاری بکەن بۆ چاودێریکردن و بەدواداچوونی گەندەڵی و ئەوانەشی کە دەیکەن، چونکە لەسەر هەموومان پێویستە هاوکاریی یەکدی بکەین لە بەرەنگاربوونەوەی گەندەڵی و ئەو پارەیەی کە بە تاڵانیشیان بردووە بگەڕێنینەوە، چونکە ئێمە بڕوامان وایە پەیوەندی هەیە لەنێوان گەندەڵی و تیرۆر، چونکە هەردووکی پشتیوانی لە یەکدی دەکەن، کە ئەمەش ئەو شتەیە هەموومان لە دژی دەجەنگین."

 

وەکو سەرۆکوەزیرانی عێراق رایگەیاند، حکومەت "بەرنامەیەکی چاکسازیی گشتگیر و خواستبەرزی گرتووەتەبەر بۆ گەڕانەوە بۆ سەر رێگە راستەکە، بونیادنانەوەی متمانە بە سیستمی سیاسی، دابینکردنی ژیانێکی شایستە بۆ هاووڵاتی و زامنکردنی داهاتووی و بونیادنانی عێراقێکی بەهێز و خاوەن توانا. هەر لەسەر ئەو رێبازەش، بەرنامەیەکمان داناوە کە کاری لەپێشینەی یەکلاکەرەوە لەخۆدەگرێت کە پێکدێت لە.. رەخساندنی هەلی کار، بەجێگەیاندنی شۆڕشێکی نوێگەریی بەرفراوان لە دابینکردنی خزمەتگوزارییەکان، بەرەنگاربوونەوەی هەژاری، بەرزکردنەوەی ئاستی بژێویی ژیان، رووبەڕووبوونەوەی گەندەڵی، ئەنجامدانی چاکسازیی گشتگیر لە رووی ئابووری و کارگێڕی، هەروەها لە کەرتی دارایی و بانکیدا، بۆ ئەوەی ئەو لاوازییە نەهێڵین کە لە سیستمەکانی رابردوودا بۆ مان مابووەوە، کە توانای گۆڕان و گەیشتنەوە بە پێشکەوتنی جیهان نەبوو."

 

لە بەشێکی دیکەی گوتارەکەیدا، سوودانی رایگەیاند، "ئێمە لەم رێچکەیەماندا قۆناخێکی گرنگمان لە ماوەیەکی پێوانەییدا بڕی. ژینگەی وەبەرهێنان لە عێراق پێشکەوت و بۆ ئەوەی بە رووی ئابووریی جیهانی و هاوبەشییە بەرهەمدارەکاندا بکرێتەوە. هەروەها ژمارەیەک رێککەوتن لە کەرتە جیاجیاکاندا واژۆکران. عێراق بووە ژینگەیەکی سەقامگیر کە وەبەرهێنەرەکان بۆ دەرفەتی گەورە رادەکێشێت. عێراق هێشتاش وڵاتێکی نەوتداری گەورەیە. هەروەها وڵاتێکی سەرەکیی بازاڕی وزەی جیهانە و دەرفەت و پڕۆژە و کاری زۆر گرنگی لەم بوارەدا رەخساندووە."

 

 

لەبارەی پەیوەندییەکانی حکومەتی عێراق و هەرێمی کوردستان، سەرۆکوەزیرانی عێراق ئاماژەی بەوە کرد، حکومەتەکەی لەڕێگەی بەرنامەی گشتگیر و جیاوازەوە "باشترین" پەیوەندی لەگەڵ هەرێمی کوردستان و سەرجەم پارێزگاکانی عێراق بەڕێوەدەبات "بە شێوەیەکی یەکسان کە لە گفتوگۆی بەردەوامدایە لەگەڵ نوێنەرانی هەرێم[ی کوردستان] و حکومەتە خۆجییەکان لە تەواوی پارێزگاکانی عێراق بۆئەوەی دەرفەتەکان بگۆڕن بۆ پرۆژەکان، کە پەرەپێدانی دەرامەت و ئابووریی عێراق بەهێز بکات."