هەڵەیەک روویدا! دووبارە هەوڵبدە
رووداو دیجیتاڵ
موقتەدا سەدر، سەرۆکى رەوتى نیشتمانیی شیعە، لەبارەى ئەو گرژییانەى بەهۆى هەوڵى هەڵکردنی ئاڵاى کوردستان لە کەرکووک دروست بوو، دەڵێت: "کورد و عەرەب بران و نابێت ئەو جۆرە پرسانە بوروژێنرێت".
ئەو هەڵوێستەى موقتەدا سەدر لە وەڵامى پرسیارێکدا بوو کە لایەنگرانى لەبارەى رووداوەکانى ئەم دواییەى کەرکووک ئاراستەیان کردووە و پرسیاری لێدەکەن، بۆچوونی لەبارەی بڵاوکردنەوەی هێزى تایبەتى عێراق لە کەرکووک و رێگرى لە ژمارەیەک گەنجى کورد چییە بۆ ئەوەى ئاڵاى کوردستان لەسەر پەیکەرى پێشمەرگە هەڵبکەنەوە.
موقتەدا سەدر نووسیویەتی: "عەرەب و کورد بران و نابێت ئەو جۆرە پرسانە بوروژێنرێت، کە ئاماژەن بۆ دەمارگیریی نەتەوەیی".
چوارشەممە 17ی کانوونی یەکەمی 2025 لە کەرکووک گرژی لەنێوان ژمارەیەک هاونیشتمانیی کورد و هێزە ئەمنییەکان دروست بوو، کاتێک ئەو هاونیشتمانییانە هەوڵیان دا ئاڵای کوردستان بخەنەوە دەست پەیکەری پێشمەرگە.
بەگوێرەى وەڵامى موقتەدا سەدر کە نووسراوەکەی بڵاوکردووەتەوە، نووسیویەتى: "پێویستە بکەرانى ئەو جۆرە کارانە بەپێى یاسا سزا بدرێن".
بەهۆى ئەو گرژییەوە چەند گەنجێک لە کەرکووک لەلایەن هێزە ئەمنییەکانەوە قۆڵبەست کران، بەڵام فەرماندەیی پۆلیسی شارەکە رایگەیاند، کەسیان دەستگیر نەکردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ