رووداو دیجیتاڵ
بڕیارە سبەی دووشەممە ناوی زیاتر لە 11 هەزار کەس بۆ دامەزراندن بە شێوەی گرێبەست لە پارێزگای بەغدا رابگەیێندرێت.
عامر داوود فەیلی، ئەندامی ئەنجوومەنی پارێزگای بەغدا ئەمڕۆ یەکشەممە 23-11-2025 بە تۆڕی میدیایی رووداوی راگەیاند، زیاتر لە 500 هەزار کەس فۆرمی دامەزراندنیان بە ئەلیکترۆنی پڕکردووەتەوە، "هەموو رێکارە کارگێڕی و تەکنییەکان تەواو بوون و دەبووایە زووتر ناوەکان رابگەیێندرانایە."
عولا تەمیمی، ئەندامێکی دیکەی ئەنجوومەنی پارێزگای بەغدا ئەمڕۆ یەکشەممە 23-11-2025 بە تۆڕی میدیایی رووداوی راگەیاند، "دامەزراندنەکە بە شێوەی گرێبەستە بۆ ماوەی سێ ساڵ و بە مووچەی مانگانەی 300 هەزار دینارە."
عەلی خەلیل عامری، ئەندامی ئەنجوومەنی پارێزگای بەغدا لە فراکسیۆنی دەوڵەتی یاسا لە راگەیێندراوێکدا ئاشکرای کردووە، "سبەی دووشەممە لە کۆنگرەیەکی رۆژنامەڤانیدا و لەبەرچاوی هەمووان، بە شێوەی ئەلیکترۆنی پرۆسەی دیاریکردن و راگەیاندنی ناوەکان بەڕێوەدەچێت."
سەبارەت بە شێوازی دابەشکردنی پلە وەزیفییەکان، ئەو ئەندامەی ئەنجوومەنی پارێزگای بەغدا ئاماژەی بەوە کردووە دابەشکردنەکە بەپێی دوو پێوەر دەبێت:
- پێوەری گشتیی بڕوانامە: 75% بۆ دەرچووانی دیپلۆم و بەرەو سەرەوە، 25% بۆ هەڵگرانی بڕوانامەی ئامادەیی و خوارتر.
- پێوەری تایبەت توێژەکان: 15% بۆ کەسوکاری شەهیدانی حەشدی شەعبی و رژێمی پێشوو، 10% بۆ قوربانیانی تیرۆر، 5% بۆ خاوەن پێداویستیی تایبەت و 2% بۆ پێکهاتەکان.
عامر داوود فەیلی، نوێنەری کوردی فەیلی لە ئەنجوومەنی پارێزگای بەغدا ئاماژەی بەوە کرد، بەگوێرەی یاسا نابێت دامەزراندنەکە بۆ پێکهاتەکان لە 2% کەمتربێت نەک تەنیا 2% بێت، دەکرێت 3 بۆ 5% بێت، بەڵام نابێت لەو رێژەیە کەمتر بێت و کوردانی فەیلی لە چوارچێوەی ئەو 2%ە هەژمار دەکرێن.
پارێزگای بەغدا بۆ 43 یەکەی کارگێڕی دابەش کراوە؛ لیژنەیەک لە ئەنجوومەنی پارێزگاکە پێکهێندراوە بۆئەوەی پلەکان بەسەر قەزا و ناحیەکاندا دابەش بکرێن، بە رەچاوکردنی چڕیی دانیشتووان و رادەی فەرامۆشکردنی ناوچەکان لەڕووی خزمەتگوزارییەوە.
ئەم دامەزراندنانە لە چوارچێوەی یاسای بودجەی گشتیی فیدراڵیی سێ ساڵەی عێراق (ژمارە 13ـی ساڵانی 2023، 2024 و 2025)ـدایە، کە تێیدا 150 هەزار پلەی وەزیفی بە گرێبەست بۆ پارێزگاکانی عێراق تەرخانکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ