هەڵەیەک روویدا! دووبارە هەوڵبدە
رووداو دیجیتاڵ
حەیدەر عەبادى پیرۆزبایی لە سەرکردەکانى "هاوپەیمانیی رزگارکردنى نیشتمان" دەکات بە بۆنەى پێکهێنانى هاوپەیمانێتییەکەیانەوە و دەڵێت: "هیوادارم یەکەم هەنگاوى رزگارکردنى نیشتمان ئەنجامدانى گفتوگۆ بێت لەگەڵ چوارچێوەى هاوئاهەنگیى نیشتمانی".
ئەمڕۆ پێنجشەممە 24ـى ئادار، حەیدەر عەبادى کە سەرکردەیەکە لە هاوپەیمانیی "هێزەکانی دەوڵەت" و ئەویش بەشێکە لە چوارچێوەى هاوئاهەنگى لە توێتیکدا پیرۆزبایی لە هەریەکە لە سەرۆک بارزانی، موقتەدا سەدر، محەممەد حەلبووسی و خەمیس خەنجەر کرد بە بۆنەى راگەیاندنى هاوپەیمانیی رزگارکردنی نیشتمان.
دوێنێ چوارشەممە 23ـى ئادارى 2022 ، حەسەن عەزاري، سەرۆکى فراکسیۆنی سەدر لە پەرلەمانى عێراق لە کۆنگرەیەکى رۆژنامەڤانیدا لە بەغدا، هاوپەیمانیی رزگارکردنى نیشتمانى راگەیاند کە لە نێوان رەوتى سەدر، پارتى دیموکراتى کوردستان و هاوپەیمانى سەروەریى سوننەکان پێکهێندرا.
حەیدەر عەبادى نووسیویەتی: "راستگۆیانە هیواخوازم ئەو هاوپەیمانێتییە هەنگاوى یەکەم بنێت بەرەو رزگارکردنى نیشتمان لەڕێگەى ئەنجامدانى گفتوگۆ لەگەڵ چوارچێوەى هاوئاهەنگیى نیشتیمانى بۆ دۆزینەوەى دەرچەیەک بۆ قەیرانەکانى وڵات و چەقبەستوویی؛ وڵات ئاوەدان نابێت و خزمەت ناکرێت بەیەکڕیزی و هاوکاریی دڵسۆزان نەبێت".
هاوپەیمانیی رزگارکردنى نیشتمان، رێبەر ئەحمەدى وەک بەربژێرى پۆستى سەرۆککۆمار و محەممەد جەعفەر سەدرى وەک بەربژێرى پۆستى سەرۆکوەزیران دیاریکردووە.
ئەمڕۆ لە راگەیێندراوێکدا هاوپەیمانیی چوارچێوەى هاوئاهەنگى رایگەیاند، کۆبوونەوەی رۆژی شەممەی داهاتووی پەرلەمان ئەنجامنادرێت، بەهۆی نەبوونی رێژەیی یاسایی ئامادەبوون و ئاماژەی بەوەش کرد، لە بەردەوامیی گفتوگۆی "بنیاتنەرانە" لەگەڵ هێزەکانی دیکە بۆ یەکخستنی بیروبۆچوون و دیدگەکان بەردەوام دەبێت.
بڕیارە شەممەى داهاتوو 26ـى ئادار، پەرلەمانى عێراق کۆببێتەوە بۆ هەڵبژاردنى سەرۆککۆمار؛ 41 کەس خۆیان بۆ پۆستەکە بەربژێر کردووە، بەڵام دیارترینیان رێبەر ئەحمەد و بەرهەم ساڵحن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ