هەڵەیەک روویدا! دووبارە هەوڵبدە
یەکێک لە ناکۆکییە سەرەکییەکانی هەولێر و بەغدا لەسەر پڕۆژەیاساکەیە.
رووداو دیجیتاڵ
بە کۆتاییهاتنی خولی پێنجەمی پەرلەمانی عێراق، پرۆژەیاسای نەوت و گاز، وەک چوار خولی پێشووی، بۆ خولی داهاتوو بە میرات مایەوە. ئەم پرۆژەیاسایە کە کاریگەری نەرێنی لەسەر مووچەی هاووڵاتییانی هەرێمی کوردستان هەبووە، یەکێکە لە گرنگترین ئەو یاسایانەی کە چاوەڕێ دەکرێت لە قۆناخی داهاتوودا هەوڵی جدی بۆ بدرێت.
زەینەب مەهدی، بەربژێر لەسەر لیستی تەقەدووم ئاماژە بەوە دەدات، "ئێمە لە قۆناغی داهاتوو هەوڵی جدی دەدەین بۆ هەموو ئەو پرۆژەیاسا پەکخراوانە، گرنگترینیان یاسای نەوت و گاز کە کاریگەری نەرێنی لەسەر مووچەی هاووڵاتییانی هەرێمی کوردستان هەبوو."
لایەنە شیعییەکان وەک رێگری سەرەکی بەردەم تێپەڕاندنی ئەم پرۆژەیاسایە دادەنرێن، و ئێستاش دەیانەوێت بە داڕشتنێکی نوێ و جیاوازتر لەوەی لە ساڵی 2007ـەوە هەولێر و بەغدا لەسەری رێککەوتبوون، تێیبپەڕێنن.
د. عەلی مزهر مەعموری، بەربژێری دەوڵەتی یاسا لەمبارەیەوە دەڵێت، "بە دڵنیاییەوە یاسای نەوت و گاز یەکێکە لە یاسا گرنگەکانی ناو پەرلەمان، پێویستی بە هەندێک دەستکاری یاسایی و هەندێک رووپۆشی دەستووری و چاودێری راستەقینەی پەرلەمانی هەیە بۆ دڵنیابوون لە جێبەجێکردنی ئەم یاسایە بۆ پاراستنی سامانی گشتی و پاراستنی مافەکانی هاووڵاتییان."
کورد لە پێکهێنانی هەر کابینەیەکی نوێ لە عێراقدا پێداگر بووە لە تێپەڕاندنی پرۆژەیاسای نەوت و گاز، بۆ ئەوەی کۆتایی بە ناکۆکییەکانی هەولێر و بەغدا لە بواری وزەدا بهێندرێت.
ئەگەر پڕۆژەیاسای نەوت و گاز بەپێی مادەی 112ی دەستووری عێراق تێبپەڕێندرێت، حکومەتی هەرێمی کوردستان لەبری پاشکۆ، دەبێتە هاوبەشی حکومەتی عێراق لە ئیدارەدانی کەرتی نەوت و گازدا، و ئەمجارە بە بەشداری کارای هەرێمی کوردستان سیاسەتی نەوتی عێراق دادەڕێژرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ