رووداو دیجیتاڵ
سەرۆکایەتیی کۆماری عێراق ئەو هەواڵانەی رەتکردەوە کە باسیان لەوە دەکرد تێچووی چاپکردنی کتێبی (بەڵگەنامەکانی کۆشکی کۆماری) زیاتر لە چوار ملیار دینار بووبێت و رایگەیاند، تێچووەکەی کەمتر لە 40 ملیۆن دینار بووە. هەروەها هەڕەشەی گرتنەبەری رێکاری یاسایی دژی ئەو لایەنانە دەکات کە "هەوڵی لەکەدارکردنی شکۆی دەوڵەت دەدەن".
ئەمڕۆ یەکشەممە، 27-07-2025، سەرۆکایەتیی کۆماری عێراق لە راگەیێندراوێکدا ئەو هەواڵانەی رەتکردەوە کە لە یەکێک لە میدیاکانەوە لەبارەی تێچووی کتێبەکەوە بڵاوکرابووەوە.
بەگوێرەی راگەیێندراوەکە، کۆی تێچووی چاپکردنی کتێبەکە (39,375,000) سی و نۆ ملیۆن و سێسەد و حەفتا و پێنج هەزار دینارە و لەلایەن فەرمانگەی کاروباری رۆشنبیریی گشتی لە وەزارەتی رۆشنبیری و گەشتوگوزار و شوێنەوار چاپکراوە و پشتئەستوورە بە پسوولەی فەرمی.
لە راگەیێندراوەکەدا هاتووە: "سەرۆکایەتیی کۆمار ئەو هەڵمەتی شێواندن و چەواشەکارییە رەتدەکاتەوە کە لەلایەن هەندێک میدیای کوردییەوە بەڕێوەدەچێت کە سەر بە چەند سیاسییەکی شکستخواردوون، بە ئامانجی چەواشەکردنی رای گشتی و داپۆشینی شکستەکانیان و قۆستنەوەی داهات بۆ بەرژەوەندیی کەسی."
سەرۆکایەتیی کۆماری عێراق ئاماژەی بەوەش کردووە، ئەو هەواڵە "پابەندی بنەماکانی شەرەفی کاری میدیایی نییە" و جەختیشی کردووەتەوە، "دەست بە مافی یاساییی خۆیەوە دەگرێت بۆ گرتنەبەری رێکار بەرامبەر ئەو لایەنانەی هەوڵی لەکەدارکردنی شکۆی دەوڵەت و ناوزڕاندنی دامەزراوە فەرمییەکان دەدەن."
سەرۆکایەتیی کۆمار داوای لە میدیا پیشەییەکان کردووە بۆ وەرگرتنی زانیاریی دروست، پشت بە سەرچاوە فەرمییەکانی سەرۆکایەتیی کۆمار ببەستن و ئامادەیی خۆیشی بۆ پێدانی زانیاری و وەڵامدانەوەی پرسیارەکان دەربڕیوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ